غزال صنعانية
إبراهيم أبو طالب25 بيت
- 1غزالْ صَنعَانِيه◆فيها الحَلا والوَسَامِه
- 2مَا مِثلها غَانيه◆جَمالْ فَاتنْ وقَامِه
- 3مثلْ القَمَرْ عَاليه◆وقَدرَها في مَقامِه
- 4لو قُلت لك حَاليه◆فكم أَصِفْ مِن عَلامِه
- 5النَّقشْ في كَفّها◆مَشْ كُلّ مَنْ جَا تِنَقّشْ
- 6والحُسنْ قَد لَفّها◆ومن حَلاها تِرَشْرَشْ
- 7والحُبّْ فِي صَفّها◆لِكلِّ مَعنى تِعَطّشْ
- 8لو قُلتْ فِيها غَزَلْ◆تِلقَى الغَزَلْ ذَابْ فيها
- 9أو قُلتْ هذه عَسَل◆طَعمْ العَسَلْ شَهدْ (فِيها)
- 10لو تبسِروا مَا حَصَل◆مِن شَوق فِينِي عَليها
- 11صَنعانِيه صَوتَها◆رِقّه وَكم فيه لَطَافه
- 12أَصلْ الحَلا قَولها◆وفي حُكاها طَرافه
- 13والغُنْجْ مِن حَولها◆يِحُفّها بالتَّحَافِه
- 14فيها الأَصَالهْ قِيَمْ◆والذَّوقْ والأَصلْ قِيمِه
- 15أَجدادها مِن (إرم)◆بنت الحَضاره العَظيمِه
- 16مَا مِثلها في الكَرم◆وفي المَودِّه كَريمِه
- 17فَديتْ مَن خَطيَتِه◆أَنغَامْ وإيقاعْ (بَالِه)
- 18(والدَّان) في مَشيتِه◆يِعزفْ ويِهوَى وصاله
- 19والفَنّْ مِن طلّتِه◆وكُلّ حَالي جَماله
- 20صَنعاء وكَم مِن غَزالْ◆فيها وكَم مِن حَسِينه
- 21يِسبِيكْ مِنَها الدَّلالْ◆كَمالْ عَاطِرْ وزِينه
- 22اللهْ ما احلَى الجَمَال!◆يَا بِنتْ صَنعا المَدينه
- 23يَا لَيتْ مَن ضمَّهَا◆وبِالحَلالْ يِقتَنيها
- 24وانَا فِدا لامَّهَا◆وكُلَّ مَن هو إليها
- 25مَا ابوح انا باسمها◆لأنّْ خَوفِي عليها