المدلَّع
إبراهيم أبو طالب24 بيت
- 1كم قلتْ لَكْ يا مُدَلَّعْ◆ترحمْ فؤاديْ المولَّعْ
- 2ما بشْ معي قَلبْ يِقْنَعْ◆والهجرْ يقهرْ ويوجعْ
- 3لو كان قَصْدَكْ خِصَامِهْ◆أو حَسّ قلبي مَلامِهْ
- 4تقومْ عليه القِيامِهْ◆ويصِيرْ تايه مُضيَّعْ
- 5لأنْ حُسْنَك حَلا لِه◆وطِيْب غُنْجَكْ صَفَا لِه
- 6سبحان ربَّ الجلالِه◆أتقنْ جمالكْ وأبدعْ
- 7وكَمَّلكْ في خِصَالكْ◆وجَمَّلَكْ في جَمَالكْ
- 8وحَسّنَكْ في دَلالكْ◆أحلى مِن الْغِيْدْ أجمعْ
- 9ما احلى كلامك وبَوْحَك◆ما أجملك حين تضحك
- 10فديت قلبكْ وروحك◆يا حَالي الثَّغرْ الاَرْوَعْ
- 11بالخالْ خَدَّك تميَّزْ◆ومن بَياضَكْ تعزَّزْ
- 12فتَّان أغيدْ ملوَّزْ◆فُقْتَ الحِسانْ يا مرعرعْ
- 13في بَسمتكْ شَهْد يُسْكِرْ◆لا اطيقْ بُعدكْ ولا اقدر
- 14على مطالكْ ولا اصبرْ◆لأنّْ قَلبي مولّع
- 15مِلِكْتْ مِنّي زِمَامِي◆أَمْسِي وطيفكْ أمَامِي
- 16واصْبحْ وذِكْرَكْ هُيَامي◆لا اتوبْ عَنَّك ولا اهْجَعْ
- 17يا آسرْ القَلبْ يِفدِيكْ◆قَلِبي المعنَّى يِمُوتْ فِيكْ
- 18وطولْ عُمره يُغنِّيك◆ينبضْ بودّكْ ويسجعْ
- 19في رقَّتَك سِرْ جذاب◆في نَظرتكْ سِحرْ ذوَّاب
- 20سلمتْ يا سِيْدْ الاحبابْ◆من عَينْ لائِمْ مِجَعْجَعْ
- 21أفديكْ يا ظَبي حالي◆بالروحْ بَاهلي ومَالي
- 22بكلِّ طيِّبْ وغَالي◆لأنَّكْ اَغْلى وأَرْفَعْ
- 23واعوِِّذكْ بالقَرابينْ◆من شَرِّ كُلّْ الشَّياطينْ
- 24بحقْ "غافر" "وياسين"◆وجَاه طَهَ المشفَّعْ