غـيـبـوبـتي طـالـت
نواف بن فيصل10 بيت
- 1غيبوبتي طالت وحلم العمر طاف◆وهـمّ التعاسة في مكاني رماني
- 2أضحك وأجامل والحشا يرعف رعاف◆مـتبعثرٍ مابين قـاصـي ودانـي
- 3ماتت جماهير الأمل قبل تنشاف◆ومستقبلي من قبل أزوره جفاني
- 4وليلي طويلٍ ماله حدود وأطراف◆والصبـح ما بيني وبينه موانـي
- 5والموج يهزا بي وانا بدون مجداف◆متغربـلٍ واليـاس حـلّ وطوانـي
- 6مانيب شاعر ينظم الحرف والقاف◆أنا قصيـدة و أبدعتها الأمانـي
- 7على مساحاتي صدى الحزن عزّاف◆وعلى جراحي تستريـح الأغانـي
- 8شيٍ بجوفي ما درى فيه شفاف◆ولا كل من يقرا الملامح قراني
- 9وين السعادة ودربها كله إجحاف◆لا راح هـمّ ... جدّ هـمّ ودعانـي
- 10كنّي مطية للشقـا بين الأجـلاف◆لا روح تفـهمني ولا قلـب حانـي