الهوى والنور
مخاوى اليل32 بيت
- 1جميل الصدفه اللي جابتك حي الهوى والنور◆عليك اجمل مسى مسيت عطني منه قنطاره
- 2احيي فيك ذكرك قبل شوفك والنبا مغمور◆واحيي فيك عطرك واسمك اللي ماليٍ داره
- 3انا من مات حي لا طعن حربا ولا منحور◆صويب العين مايبرى غدى قلبي لك الشاره
- 4بغيت امشي واحس انه غدا مني القدم مبتور◆بغيت اقف واشوف عظام كل الجسم منهاره
- 5انا من خانته عبرة فرح ولا ضحك مسرور◆يضيق به النفس وده يقول من الحكي خياره
- 6اشيل غناي لك عرضه وابدل به على المجرور◆وامول من طواريقي على عشاق سماره
- 7ابكتب من قصيد الوزن وغيره من شعر منثور◆انا لك شاعر يكتب وشعره نقوة افكاره
- 8الا ياغايب عني مع حاضركم الدستور◆خيالك مايفارقني بفكري دق مسماره
- 9الى من ضقت اسولف بك على نفسي وانا مقهور◆واقول الوقت مايعطي على مااريد واختاره
- 10عليك اقبل ومنك اقفي ولا بينت لك محظور◆اخاف عيون بعض الخلق ترقبنا وسباره
- 11وجدك الله ياحسن كما التحفه وانا جمهور◆انا المبهور من حسنك وانا من خطفت ابصاره
- 12ومنك العين تامرني وانا لك طايع مامور◆على وصلك غدا حظي هوين وقصرت اشباره
- 13اشوف ان الحسن عقبك ولو يذكر غدا مكبور◆يقال انه حسن والا انت كل الزين وابهاره
- 14لا يابو عيون حق وبعض الوصف خرس حور◆عليك الصوت ماهو صوت كما ترنيم قيثاره
- 15بقى قصرك على فالك عساه بطلتك معمور◆تمشى بردهته حافي وتحيا عقبك ازهاره
- 16بريح المسك والعنبر تخالطهم زراق بخور◆الى اقبلت جا قبلك ولا اقفيت عدا استاره
- 17على هالبوح والتلميح راس المال صدق شعور◆وصدقني ترى فكري عقب طيفك محد زاره
- 18انا باسالك تعذرني عساي بطلبتي معذور◆اشوف الوقت مايعذر ولا في الناس عذاره
- 19ذكرت اليوم والساعه ورحلة عمر يامستور◆ذكرت الله في خلقك خلقه الزين واسراره
- 20اعرف اني مـ انا بـ اول ولا اخر واحد ماسور◆واجمل ماملكته منه طيف دام تذكاره
- 21الا ياليت لي قلب يطيع الراي واهل الشور◆ضحية موقف عابر ورحلة سفر طياره
- 22وكان الوقت عصريه تعدينا حدود السور◆ويم القاهره طرنا بجو حافل اخطاره
- 23مقاعدنا باخر صف ومقعد سيدي مشغور◆على يسراي كان هناك اشوف اطباع جباره
- 24اشوفه كل هالفتنه ثقل عقل وسلوك طهور◆حصين محصن شامخ يبيّن كبر مقداره
- 25واشوفه ديمتن تحيي نابت الارض بالممطور◆بغيث يوم اشاهدها وجرفني فيه تياره
- 26ذهل لي مبرم العاتق وشلال الشعر موفور◆وذاك المبسم الوردي بلون الزهر قطاره
- 27وقد اطرق هايف رشيق وخاصر مضمور◆قوام اعتدل طوله يثير قلوب جباره
- 28اغني واعتني بذكره ولا اطمع كورد بالميسور◆وعودي كم شكى مني بعزفي تبكي اوتاره
- 29احبك والهوى جاير وبحت السر لك بسطور◆وقلبي ماسلا عنك ولو يتعبه مشواره
- 30ابرسل لك مع النسمه سلام الخافق المكسور◆عسى يجبر عزاه انك تجيه وتنطفي ناره
- 31اعرف النفس تواقه واعرف اني مـ انا مسحور◆ولكن سحر زينه صار ياخلق الله شعاره
- 32انا والليل والهاجس قطعنا بالخيال بحور◆ابي منهو يوصلني ومن يعطيني اخباره