مثل الجبل رآسي
محمد بن عمار17 بيت
- 1مثل الجبل راسي ولا هزّني الريح◆قدام من بعيون طبعه يرى الناس
- 2علم ٍ كسبته من رجال ٍ طحاطيح◆على النقاء خذته من الرأس للرأس
- 3اللي يدسّم ، شاربه ،، بالمفاطيح◆ماهو بمثل اللي ،، شفاياه ، يبّاس
- 4وكم قلت أنا لأهل العقول المشافيح◆أهل النمايم ،، بين عاذل وبلاّس
- 5الطيب شيمة ، في الوجيه المفاليح◆لاهوب لايوزن ، ولاهوب ينقاس
- 6ومحدٍ يجيبه بالرخص والتصاريح◆كل ٍ على مجناه ،، والعرق دسّاس
- 7لي مدة ٍ ،، بنات فكري ، مساريح◆متعومس ٍ الرآي ، والفكر محتاس
- 8بالصاحب اللي ماشترى للمصاليح◆عرفي ولاأرخص حبنا عدم الأجناس
- 9حب ٍ نشأ ،، من موجعات التباريح◆مدعوم بأركانه ، ومبني على ساس
- 10للي بصدره ، مثل ، طلع التفافيح◆إلى إنهصر قده كما هزعة الآس
- 11مطلق على المتنين شقر ٍ مداليح◆كل ماتثنّى ياردن روس الأطعاس
- 12والخد يكسر نور كل المصابيح◆ناصع بياضه مثل مصبوب الألماس
- 13وبيض الثنايا مثل نظم المسابيح◆وغضيض ورد ٍ داخل الفاه غرّاس
- 14إلى طرالي قمت مفجوع وأصيح◆ياردني بهاجوس ويصدر بهوجاس
- 15وأفزّ مع طاريه وأقوم وأطيح◆ولاجيت أبا أشرب شفت له طيف بالكأس
- 16وأقول لأصحاب القلوب المجاريح◆بحر الهوى ياما غرق فيه غطّاس
- 17ومن هاب في مرقاه عالي المطاميح◆يقضي حياته تحت الأقدام منداس