غربة مشاعر
محمد بن عمار18 بيت
- 1ضّمي كفي يالحبيبة في يمينك صافحيني◆أنقذي بضمّـة حنانك روح بتفارق بدن
- 2نبض قلبك هزّ جسمي من تشابكنا اليديني◆وجددّ لذكرى الحنين وصحبة أيام ٍ خلن
- 3قلبّ آلام المواجع وهج نورك بالجبيني◆بعد ماإغتال الهجر نور الأماني اللي بقن
- 4والله إني محترق من نار نورك صدقيني◆وإرتحلت بصحبة الآميٍ مع آمالٍ غدن
- 5رحلتي غربة مشاعر رافقت صرخة أنيني◆مع صدى الآهات تاهت وأصبحت غربة وطن
- 6من بعد ما أقصت رياح الياس منطاد السنيني◆الرجاء أشعل شموع ٍ في سماء عمري طفن
- 7في غلاك القلب يانور النظير أصبح رهيني◆والمشاعر، لو تطيلين النظر فيني ، حكن
- 8طلعتك ، قبلة حياة ٍ كلما أغرق ، تنقذيني◆وبسمتك نبضة أمل للي بقا لي من شجن
- 9ثارت العبرة تفاعـل مع دموع ٍ نازليني◆لسّلة سيوف ٍ بعينك ، يوم لدّيتي ، سطن
- 10وإرتفع موج العواطف واصل ٍ منسوب عيني◆ونظرتي في ساحل عيونك مراكبها رسن
- 11إستقرن في ضفاف الرمش وبيّحت الكنيني◆وبادلتني ،، بالتحايا ، مثل ترحيب لقن
- 12كم لي أشكي من معاناة المفارق إرحميني◆مشغل أفكاري خيالك وين ما يسري سرن
- 13شقتّ الأفراح سترة غيمة الوجد السجيني◆وسالت الشمس بشعاع أطياف لعيوني غشن
- 14وثار منقوض ٍ تطاير فوق متنك خصلتيني◆تلعبين ابهن قبالي ، والعقل خطر ٍ يجن
- 15زاد من حرقة خفوقي سحر لحظك ياضنيني◆وجمرتين ٍ تشتعـل من خاتم المبسـم بدن
- 16كيف ياشهلا الكواحل ، عيا قلبك لايليني◆والعواطف كلما ، جيتي على بالي ، بكن
- 17ويش قصدك ياحياة الروح ، يوم تعذبيني◆وأنتي ماقبلك بوسـط القلب إنسانٍ سكن
- 18في مراتع واحة الذكرى بقلبك إرسميني◆وإنقشيني قلب مجروح ٍ وله سهمك طعن