شقائق النعمان
محمد بن عمار34 بيت
- 1سر ياقلم وإبدع جميل المثايل◆لأم العيون ، اللي هدبهن مراييش
- 2مع الكلام اللي حوته الرسايل◆سلامي ، لعذب الثنايا المباهيش
- 3شهلا العيون الناعسات الشعايل◆وشقرالحواجب باريتها المناقيش
- 4لامن طرت لي هل ّ دمعي همايل◆مسايله ، من فوق خدي تراشيش
- 5تعبت أنا أحاول بشتى الوسايل◆لكن على كثر التعب ، ماحصليّش
- 6يابري حالي لامشت في تمايل◆من فوق كبدي مثل طرق الشواكيش
- 7في مشية ٍ مثل البكار الأصايل◆حدر النجايب مع خروج ٍ منافيش
- 8الساق مبري مثل غصن الفسايل◆مع نا بيات ٍ ، لا تثنّت ، مداقيش
- 9والطول فارع مثل ركز النقايل◆ورسمة خضابٍ ٍفي يديها نقاريش
- 10بروض الصدر خط ٍتوسط وشايل◆مايسترالملبوس خلف الكراميش
- 11داير مدار وما حوى ،، للسوايل◆قالب حلا ، وامجمّل ٍ بالمراقيش
- 12تنقض على الأمتان سود الجدايل◆في لونهن مثل الليال المغاطيش
- 13وتارد على الأرداف روس الثلايل◆وامخصّر ٍمحزوم مثل المهابيش
- 14تلبس حرير ، ومرهيه ، بالخمايل◆ما قللت من قدرها ، بالدناديش
- 15ماشفت انا في حسنها بالحمايل◆بين العرب أوعند حمر الطرابيش
- 16لو كان في المليون ، قلة قلايل◆حول الحلايا مابهن من عراميش
- 17فرق الثرى عن الثريا دلايل◆في حسنهن عن حسنها أم العكاريش
- 18لو خيّروني قلت ما ارضى بدايل◆لوكان نقوة في البنات الفرافيش
- 19ما اطيع فيها كل ما قال قايل◆بنعقة غراب البين ونفث الخفافيش
- 20أهل الحسد ما منهم إلاّ الفشايل◆بالهرج رنانة ، سوات القراقيش
- 21بالنـّم ، ما خلـّوا قصير ٍ وطايل◆لاشك أنا ، مالي ومال الحرافيش
- 22حبي لها مع دورة الدم جايل◆بنبضة خفوقي بالعروق المراعيش
- 23ما هو بحب ٍ بالخدع ، والحبايل◆ولا مكايد ، من سوايا الدراويش
- 24حب ٍ دفين ٍ له بجوفي ، نثايل◆شقائق النعمان ، حوله ، مفاريش
- 25ياوجدعيني وجد راعي الرحايل◆ساعة لفى يم الضعون المعاطيش
- 26الوقت قيض ومستعر بالقوايل◆وهو دريك ، وما يجيد المطاريش
- 27أشوف ، من قد ذوّقتني الهوايل◆خلّت عقول الناس منها مرابيش
- 28لاحلـّت بدار ٍ، سقتها المخايل◆التين و الأعناب ، فيها معاريش
- 29ماقد مشت درب الردى والرذايل◆وما سفهتها الزبرقة والزراكيش
- 30أخت الرجال ، مكرّمين الخصايل◆هانت ذياب ٍ،، لابسين ٍدشاديش
- 31وقفت على وضح النقا بالفعايل◆راياتها بيضاء ، ولاهن مغابيش
- 32ياليتها ، تكسب بحالي جمايل◆نعيش ، ونبعد عن حياة التهاميش
- 33وإلاّ العدو ، لابد له يوم زايل◆يموت وهمومه بصدره ، مدافيش
- 34مثل الحنش يموت ختل وتحايل◆والسم وسط أنيابه اللي مناهيش