الموادع
محمد بن عمار15 بيت
- 1يوم الموادع لج ّ بالفكر لجّاج◆قامت تحشرج عبرتي مع ونيني
- 2الكبد فاحت في الحشا توهج اوهاج◆والدمع هلّ وباح خافي الكنيني
- 3على غرير ٍفي البلد ما بعد داج◆عمره ثمان وخمس واربع سنيني
- 4وياحمس قلبي حمس بن ٍ على صاج◆من فوق جمرالرمث له محرقيني
- 5يرهج على فرقاه في صدري ارهاج◆وسط القفص سوات طير ٍسجيني
- 6ماجت بي الدنيا وكعب الرجل ماج◆من عقب ما قفوّا بمضنون عيني
- 7جرح المفارق في الحشا ماله علاج◆الله على فرقا عشيري يعيني
- 8والله ، لولا المنقدية والإحراج◆لأصيح بأعلى الصوت بالحاضريني
- 9وأقول أنا صكيّت ، بابي بمزلاج◆وطويت صفحات الشقا والحنيني
- 10أفرش لمن يشريني الأرض ديباج◆ومن باعني بعته ولو هو ضنيني
- 11لوكان مدرج في سجل الغلا ادراج◆بأرشيف قلبي مآخذ ٍ ، صفحتيني
- 12ماكل من هو ، مدّ كفه ، بمحتاج◆وما كل محتاج ٍ ، يمد اليديني
- 13وماكل من يارد على البير هدّاج◆وماكل من هو صاد ، جاب الثميني
- 14ولاتآمن الدنيا على كل منهاج◆لو هي صفت لك يوم باكر تشيني
- 15وترى الدهر مثل البحر كلما هاج◆يغرق مراكب ، وأهلها غافليني