الصافنات المساريج
محمد بن عمار18 بيت
- 1سج الفكر واهموم قلبي معاريج◆والنوم جافا العين ، وجدد سهرها
- 2غدت طعون القلب مثل الخراريج◆من شاف حالي في شقاها عذرها
- 3يرجف رجيف الصافنات المساريج◆يوم الطلا يب ، جامحات ٍ بأثرها
- 4إذا عدت تطوي ، فيافي الزراريج◆في ليلة ٍ ، مفقود ،، فيها قمرها
- 5يدكني الهاجوس ،، دك البواريج◆والروح من جوره ، تزايد قهرها
- 6أعوي عواء ذيب ٍبعالي المداريج◆دمعي على الأوجان ،هل وغمرها
- 7إنشل فكري ،، من عيون ٍ تباريج◆للي بسهم الموت ، يقدح شررها
- 8تلت خفوقي ،، مثل تل الدراريج◆لرشاء الدلو، والصوح جاله نثرها
- 9حبي لها ماهوب حب الخواريج◆حب ٍ ضنى حالي ، ونفسي دمرها
- 10على النقاء ماهيب تمشي بهاريج◆عن كل درب ٍشين غضّت نظرها
- 11ماعمرها تسمع ، لحكي الهراريج◆وأهل النمايم ، يوم شاعوا خبرها
- 12نزّهتها ، عن موجبات التحاريج◆وقدمت روحي ، والمشاعر مهرها
- 13جاعد شبيه ، امعرّجات الكراريج◆فوق المتون ، امجدلين ٍ شعرها
- 14الصدر زامي فيه بيض الفراريج◆والقد غصن ٍ ها زع ٍِ به ثمرها
- 15والخد يشعل ، مثل نور السراريج◆والجمر يوقد ، في مجامر ثغرها
- 16والوسط مطوي مثل طي الكواريج◆والعقد مفتول ٍ ،، يطوّ ق نحرها
- 17راعي الهوى ، ماظن يلقى مخاريج◆مهما عن الغزلان ، نفسه عسرها
- 18يصبر عسى ربه يجيب التفاريج◆وترتاح نفسه ، من تزايد كدرها