الالفيه
محمد بن سعد الجنوبي28 بيت
- 1الفٍ اولف من حسين الكلامي = في الصاحب اللي رضاه غاية مرامي◆شفقٍ على شوفه ولو فى منامي = لكن زماني صعب مافيه حيلات
- 2والباء بلاني الله بصده وحبه = فرقى الحبايب ياهل العرف صعبه◆حسبي على من كان للهجر سبه = جعله ردي الحظ في كل الأوقات
- 3والتاء ترى بعض المحبة خساره = لاطحت مع شخص بعيده دياره◆تقضي حياتك مانوى لك زياره = ولا يشتحن لوقيل له صاحبك مات
- 4والثاء ثلاث أشياء حلاة المودة = لامن تهيا الصاحب اللي توده◆أيضاً وصار السد عندك وعنده = والثالثة مايسمع أهل النمامات
- 5والجيم جسمي عجز من شيلة الثوب = اسباب من لا فيه عيب وعذروب◆ياناس كيف أقوى الصبر عنه واتوب = راحت حياتي بين روحه وجيات
- 6والحاء حسين الدل طبعه تغير = وأنا على ما صار فكري تحير◆أول عليّ في البيت دايم يسير = واليوم أشوف الزين ناوي بصدات
- 7والخاء خوف الله ياحبيبي بحالي = وارحم عليلٍ ماينام الليالي◆لوتعرف اللي من سبايبك جالي =أسهر طوال الليل ماانام ساعات
- 8والدال داو القلب يا نور عيني = واسمح دخيل الله لنا بكلمتيني◆وش السبب ياسيدي ماتجيني = قل لي ووضح لي جميع الحكايات
- 9والذال ذكرك دايم في لساني = انت الوحيد اللي اشتهيه في زماني◆انا اشهد ان الله بحبك بلاني = واشوف حبك خلخل الحال بسكات
- 10والراء رماني بالعيون الكحيله = ومجدلٍ كاليل مالي شليله◆عز الله ان روحي من أجله عليلة = نفسي ملاها ناعم العود حسرات
- 11والزاء زماني ما صفالي ولا يوم = وعيوني القشرى جفت لذة النوم◆وين اهتني واللي يبي القلب معدوم = يا حيلة الله وين أنا والسلامات
- 12والسين سم الحال سيدي و قفى = ومضى عليه اشهور عني تخفى◆نوري عقب فرقا اريش العين طفى = ياحسرتي على زمان لنا فات
- 13والشين شاب الراس والقلب محتار = عزي لمن قلبه على واهج النار◆يا زين عطني صورة منك تذكار = لعلها تبري جروح طريات
- 14والصاد صبري منك واصل حدوده = وعيب على الطيب ينقض عهوده◆يوفي بوعده لو تبين سدوده = هاذي حلاة الحب في كل الأوقات
- 15والضاد ضحايا الحب ناس كثيره = امحيسنٍ و مجنون ليلى وغيره◆كم واحد قبلي شكى من عشيره = و مشاكل اصحاب المحبة كثيرات
- 16والطاء طلبته حاجتينٍ هوينه =ابيه ليمن مر يخش عينه◆ولا يقابلني ويحرك جبينه = يكف عني لايشوف العقوبات
- 17والظاء ظنيته وليف الشدايد = واثره على ما قيل راعي فوايد◆ياما يمنيني بكثر الوعايد= والهقوه ان الكذب للزين عادات
- 18والعين عاد الحب في القلب باقى = يا نور عيني لا يطول الفراقي◆كويتني كي السبيل العراقي = وعذبتني يا ابو عيونٍ كحيلات
- 19والغين غبات البحر غصت فيهم = خرجت نفسي من بحور اجيهم◆كل البحور انا تسيطر عليهم = وابحور حبك ياحبيبي غزيرات
- 20والفاء فلاادري ويش بيجري علينا = انا معك في ذا الحياة ابتلينا◆امرٍ كتب في اللوح ماهو بيدينا = ما ينكتب للعبد ما فيه حيلات
- 21والقاف قربت القلم والدواتي = ميس من الدنيا بكتب وصاتي◆مادام هذي حالتي وش حياتي = الموت ارحم من حياة الكلافات
- 22والكاف كم لي صابر للبهاذيل = اقول يمكن ينتهي الهم ويزيل◆راحت حياتي ما لقينا محاصيل = ياالله بحسن الخاتمة في النهايات
- 23واللام لولا خوفي الناس يدرون =لقول انا مع زين الاوصاف مفتون◆ولاشك اخشى قولة افلان مجنون = والناس عجلينن بنشر الدعايات
- 24والميم مدري ياعرب وين باروح =اضحك وأنا قلبي من الهم مجروح◆يااهل الهوى لو بارفع الصوت مسموح = خلوني اهيض من الصدر عبرات
- 25والنون نوم الناس حارب عيوني = واللي يعرفون الهوى بيعذروني◆يا حسرتي ان كان احبابي جفوني = راح العمر ولا تفيد الحسوفات
- 26والهاء هويته في عصور الجهالة = فرشت قلبي منزل له لحاله◆وانا اشهد إني عنه ما ني بداله = ودي بشوفه لو لحقني خسارات
- 27والواو وين القى مظنة فؤادي = اللي إلى جيته تسهل مرادي◆هذا الذي ما طاع هرج الاعادي =إخلص معي في الحب سر وعلانات
- 28والياء يقول محمد بن الجنوبي= يا رب تغفر مامضى من ذنوبي◆وتمت وصلى الله عداد الهبوبي = على النبي سيد جميع البريات