يا هاجسي
محمد بن راشد ال مكتوم7 بيت
- 1يا هاجسي بالشعر بالله مهلا . . . على الخفوق و نازفات الفتوقي◆خلني على حسب المزاج اتملاّ . . . واختار من دانات عمق العموقي
- 2اجيدهن من فكرتي واتسلاّ . . . واحبس همس احساسهن في عروقي◆إن عنت الافكار والفكر علاّ . . . في نو قاف اللي تقافا بشوقي
- 3إيطيب لي في منتهى الكيف ولاّ . . . ابقى على ناري وشمسي وذوقي◆يا من دهاني الصدود وتولى . . . يا ليت لو تدري بوجدي وشوقي
- 4حسنك ملكني في الهوى واستحلاّ . . . يا ليت تطلق يا مودي سبوقي◆حرّقت قلبٍ من صدودك تقلا . . . مضى اللهيب وتم رسم الحروقي
- 5تتجدد اشواقي إذا الشوق يبلا . . . مثل الشجر جدد غصون وعروقي◆وانا على صبري لها ما أملا . . . ما كّثر ظلايمها وما ضيّع حقوقي
- 6ما كل ما يغليك عندك بيغلا . . . وما كل من يدعي صديقٍ صدوقي◆هيّج شجوني ناظمٍ في السجلا . . . صوته يلحّن كايدات الطروقي
- 7مثله انا اهوى التحدي ويحلا . . . عندي واطريب للشدايد واتوقي◆معانيٍ للفاهمين اتجلاّ . . . تاتي عظيمه مثل ذوقك وذوقي