الي..؟
محمد بن راشد آل مكتوم10 بيت
- 1إنتِ مثل ما انتِ على كثر ما مَرّْ◆أغلى البشر ما حَدّ يسواك عندي
- 2غلاك ما أخفيه واقولها جَهرْ◆يا حلمي الأوّل وقَبلي وبَعدي
- 3حروف اسمك في فؤادي لها سِرّْ◆اسمك عن وصف الملاحه يسدّي
- 4يا دهن عودٍ إن ترَتَّبْ تبعْثَرْ◆والأوّل الثالث ترى العود هندي
- 5لك فوق حَدّْ العُمْرْ عُمْرٍ ولي عُمْرْ◆عندك وإنتِ ما بقى العُمْر خَلدي
- 6يا صافيه كالبدر يا عَمَّةْ البَدرْ◆يا نور يا منثور فلٍ ووَردي
- 7إذا ظهرتِ ساعةٍ شفتها دَهرْ◆وطالع الباب أنتظر أن تَردّي
- 8كَرّْ الّليالي والّليالي لها كَرّْ◆ما غيَّرَتني وانتِ أيَّام سَعْدي
- 9يا سِيْدَةٍ ع البِيض والحُمْرْ والسُّمْرْ◆يا شوق ما أحْصِيهْ جَزْرٍ ومَدّي
- 10كلّ الّليالي شفتها ليلة القَدْرْ◆من يوم شفتك يا غرامي ووجدي