ياما برأس الناب
محمد الأحمد السديري21 بيت
- 1يا متلف روحي تحملت الاثام◆ما خفت من يوم تدور الدواير
- 2يهب دلاب الهوالي بالاولام◆ونقض الديون المرمسات الكباير
- 3لا تمان الدنيا ودورات الايام◆اخاف من ناس يقولون باير
- 4راقب ولي العرش يا خشف الاروام◆يا مترف حكمه على الروح جاير
- 5عانيك جسمه هيكل جلد وعظام◆تشهد محاني لوعته والجباير
- 6وتشهد عليه دموعه الغرز خرام◆من موق عينه فوق خده نثاير
- 7ويشهد عليه إلى وطا دارك العام◆ياقف على مضراب الاطناب حاير
- 8ياما برأس الناب عضيت الأبهام◆وقفت في تالي منازلك خاير
- 9منازل فيها يحيرن الاقدام◆ومن حب ساكنها نحب الحظاير
- 10قل لي بحرف القاف والبا مع اللام◆والف تكمل جلها والصغاير
- 11وان قلت كلا جار حكمك بالاعدام◆وقتلت من لا له عوين وثاير
- 12افتل بحبلي وانت تنقض بالابرام◆وجرعتني غل يفت المراير
- 13بين اشفتيك اشفا فوادي والاوهام◆واسألك بالله عن خفي الضماير
- 14اما بحبل الوصل تنصف بالاحكام◆والا تجور وكل ما قلت صاير
- 15وارضى بحكمك ماشي درب الاسلام◆مملوك والمملوك بالامر ساير
- 16واقول هذا رأس مالي والاقسام◆وليا تردي الحظ تعمي البصاير
- 17يا طاردين العشق باوهام واحلام◆خوذ وكلام اللي بالاصلاح شاير
- 18العشق مره علقم رايب سام◆وحلوه عصير الكرم بالكاس فاير
- 19لا شك شره ضد خيره إلى قام◆وكم عاشق بصباه زار الحفاير
- 20ذا قول من هو ساهر الطرف ما نام◆يعد شيء شاهر بالنظاير
- 21شاهد بعينه من مشى له بالاحرام◆وعسى على الباغي تدور الدواير