قلب صفق
محمد الأحمد السديري17 بيت
- 1قلب صفق من بين محني الأضلاع◆وعين تهل دموعها من ولعها
- 2بغيت اعذل القلب لا شك ما طاع◆ان خايلت عيني خيال تبعها
- 3قلب لها في كل الاحوال مطواع◆يمشي مماشيها ويتبع سنعها
- 4ترميه ببحور طويلات ووساع◆مجنون ليلى خاضها ما قطعها
- 5ما للقدم والقلب والعين رداع◆هامن غباب نوح الأول ذرعها
- 6منهن بليت بجادل توجع أوجاع◆بسود تعالى شان رب صنعها
- 7سود نظرهن يودع القلب ينلاع◆ومما عمل هاروت سحر نشعها
- 8لوجا نظرهن فوق صم الصفا ماع◆ولو طرفهن شاهد لرضوى صدعها
- 9الجادل اللي ذكرها بالملا شاع◆ومنها جميع هموم قلبي نزعها
- 10وأن ضرني بالحب ماهوب قطاع◆وليا طلبته حاجة ما منعها
- 11ولاني على ما يجرح العرض طماع◆ونفسي عن الهسه شرفها ردعها
- 12اللي مشى لك شبرقم وامش له باع◆ونفس الرخيص بسومة الرخص بعها
- 13الزين من دونه رواصيد وسباع◆لا هايب منها ولا اخشى فزعها
- 14انا بعون الله على الكود بتاع◆واطلع جبال ترهق اللي طلعها
- 15ان غاب عني كل عقلي معه ضاع◆ودنياي عقبه عفت باقي طمعها
- 16لا شاري فيها ولا نيب بياع◆وعجزت تسعني ربعة من ربعها
- 17وان هب لي من يمة الشوق ذعذاع◆الروح من بين الضماير شلعها