الملحمة الزايدية
محمد الأحمد السديري160 بيت
- 1-عفا الله عن قلب يزيد عناه◆وداعـي غرامه للغرام دعـاه
- 2ماطاع عذالٍ يعذله من الملا◆وان سمع عذاله يزيد عناه
- 3إلى توسع خاطره ربع ساعه◆على الضيق داكوك الهموم نحاه
- 4قلب براه مجادل الضيم والعنا◆الضيم مـن بين الضلوع براه
- 5دع القلب ياعذال خله بغايته◆هـواك مايتبع طريق هـواه
- 6دع القلب ياعاذل عذلك◆يضره يـزيد ياعاذل عليه شقاه
- 7كونه الايـام لين أوجعنه◆وعـزى لمن حر الزمان كواه
- 8يكويه من هجر النيا حامي الطنا◆يضيق بـه مما دهاه حشاه
- 9يحن حنات الخلوج لجنينها◆والخلج مفهوم تحن ظناه
- 10ماحزنها حزنه ولاربع مابه◆وحياة مـن نشا السحاب بماه
- 11على جادلٍ ما شافت العين◆مثلها احيا بذكري من هويت لقاه
- 12عشيري شرابي من مناظيم مبسمه◆يجلا عن القلب الدريك ظماه
- 13اداريه عن شىء يحسه ويغضبه◆وإلى زعل يصعب على أرضاه
- 14ان دك بي من حامى البين◆هاجس وجرعت من حر الغرام طناه
- 15تذكرت من طلابة الجود نادر◆رفيع الذرا عسر الدروب مشاه
- 16مشى بدرب المجد والنفس تدفعه◆الـى شامخ عسر الدروب سناه
- 17خالد سنام الطيلات بن فيصل◆حجا من لجابه والزمان وطاه
- 18ابشكي على فرز الوغى جاير الهوى◆شطون الشفاوي والشفاوي تاه
- 19قد تاه ببحور الغرام المظلمه◆دليل الخطا عن من يريد نحاه
- 20نحاه عن حي يوده من الملا◆ومـا فات من يومٍ يزيد غلاه
- 21غلاه في قلبي تجدد علايمه◆وتكتب على القلب الدريك اسماه
- 22اسماه وأن عرضت مع الناس◆صفقت محاني فـوادى والحبيب رماه
- 23رماه بسهوم المحاجر وجندله◆قليل الفزع ظلم الحبيب دهاه
- 24دهاه بالفرقا وقلبي له انتما◆يتله ومـن بين الظلوع لواه
- 25لواه يوم انه على الحب يلتوي◆ومـن دينه دين الجميل اوفاه
- 26اوفيه بالروح العزيزه ولو غلت◆روح تـبي روح تحب جـزاه
- 27اجزاه لو انه رماني وجادني◆يمحا خطا الغالي عظيم إرضاه
- 28إرضاه يبهج خاطري عقب ضيقته◆ويـرتاح قلب بالفؤاد فـراه
- 29فراه في وسط المحاني وعذبه◆وان عـذبه سـهل عليه أدواه
- 30دواه عنده سبايب مصايبه◆واشفاه مـن كوثر نظيم شفاه
- 31ارجيه لو دونه من الناس حاسد◆رجـاي بـالله ماقطعت رجـاه
- 32ارجيه لو دونه جموع تصدني◆وحبل الرجا يضفي على رشاه
- 33وقد قيل للعراف في ماضي مضى◆هـذا لهذا مـن هـذاك رواه
- 34يمنى بلا يسرى قليلٍ حصيلها◆ورجـلٍ بـلا ربع يخاف اعداه
- 35ماهبلك ياباغي من النذل فزعه◆رجـواك مـن عند الجبان سفاه
- 36رفيق الرخا ينسى مودة رفيقه◆ليا ضاق به شين الزمان نحاه
- 37عوين الدهر مايامن الجار جانبه◆وليا عـرض للشامتين شناه
- 38على داره السودا تبني خيامها◆عوين الدهر شين السواد غشاه
- 39خذ يالبيب القلب مني وصيه◆حميدان في ماضي الزمان لقاه
- 40إختر من الخلان حي توده◆تسبق على فعل الجميل يداه
- 41دليل على العليا بعيد من الخطا◆الطيب فـي دنيا الحياة مناه
- 42ماجال في قلبه من الخوف جايل◆وان كـاد مرقا الطيلات رقاه
- 43ولا ضعف النفس العزيزه الجارته◆ولاهروولت للمحصنات إخطاه
- 44يفرح به العاني ليا حده القصا◆وللضيف معسول الكلام نباه
- 45وان جاك من يمة معاديك ريبه◆مـن قبل ماتاطا عليه وطاه
- 46صديقك صديق له وضدك يضده◆وعلى روس عدوانك تدير رحاه
- 47هذاك حطه لك رفيق موالى◆عونك ليازاد الزمان بـلاه
- 48مايفصل القالات الا رجالها◆ولاكـل مـن شيد بناه حماه
- 49ولا كل من ركب الجواد عدابها◆على حامي الهيجا وحر لظاه
- 50ولاكل من نوى لدار رحل◆لها يـموت مالحق هـواه إمناه
- 51ولاكل من رام المراجل ينولها◆ياعسر مقضبها على يمناه
- 52ولاكل من ركب المطايا غزابها◆ولاكـل مـن رام الغريم قـواه
- 53ولاكل من يبرم عهود وفابها◆يطغى على فعل الجميل رداه
- 54ولاكل من ودع لسر يصونه◆وكـم واحـدٍ سر الصديق أبداه
- 55ولاكل من حصل حلالٍ صخابه◆يبين بالوقت الشديد صخاه
- 56ولاكل من جالس هل العلم عالم◆وكـم عالمٍ ضر العباد خطاه
- 57ولاكل من ناله جميلٍ يرده◆ولاكل من شاف الحريب نصاه
- 58ولاكل من سل السنان صطابه◆يموت وسنانه جضيع إخباه
- 59ياناشدٍ عني وانا لي قبيله◆لها المجد زايـد بالرفاع بناه
- 60وكمل مقام المجد عامر وشيده◆طريق المعالي للدخيل مشاه
- 61كونٍ جرى على واضح النقا◆الاشراف جضت من عظيم بلاه
- 62مزنٍ تزبر فوق سلى صواعقه◆تشظّف من خشوم الجبال حصاه
- 63نشا من ثنايا برك ترعد مخايله◆من الشرق غيظ بالصدور حداه
- 64غيظ مخيف يطحن الغيظ◆والغضب وماطال من روس الخشوم طماه
- 65امطر على الاشراف وانهل وبله◆عليهم تنثر بالغزير طماه
- 66قوز الشريف اكبر علايم دلايله◆سيله تدفق هـد كـل انياه
- 67سيله عجاج الخيل والبيض والقنا◆وروس النشاما بالحزوم غثاه
- 68تشهد على ماقلته العامريه◆جضت أسبيع من عويل ابكاه
- 69تبكي على فتخان الإيمان غلمه◆تعشوهم اللي بالحروب اعصاه
- 70والضبعة العرجا تعشا بدربهم◆وكـم ضيفوا ذيب يجر إعواه
- 71والطير يلقى البر من ضرب شلفهم◆مضاريبهم يعي الطبيب إدواه
- 72وش حل بالاشراف غالب وراجح◆اقفو كما صيد حدته إضراه
- 73اقفو على قب تخافق مع الوطا◆تنازا بطوعات الرقاب حذاه
- 74من ولب عطبين الهوايا آل زايد◆لهم صانع السيف الصقيل حناه
- 75حناه وارهف شذرته يوم كمله◆وعطاه لمن هم بالحروب عداه
- 76حيث أنهم يروون حده من العدا◆بأيمانهم روس الفهود عشاه
- 77إلى عدا فيهم حريب وزارهم◆يعدلون بحدود السيوف صغاه
- 78وجريس ماطاله من الظيم طايل◆اسـود الشرى عمن يبيه حجاه
- 79اسود الشرا بالضيق تنجي دخيلهم◆ويـروون مـن دم الرقاب ظماه
- 80فكوه ثم اغنوه يوم انه التجا◆وجـه أبـن بدران يزيد ضياه
- 81تجمل مع جريس اليماني وعزه◆الـزايدي يـوم الدخيل عـداه
- 82يشهد العامر مامضى من فعايله◆يـوم إن غالب بالجموع نصاه
- 83يبي دخيل البيت ماخاف خالقه◆دخيل عطبين السهوم إرماه
- 84واقفا ذليل يتبع السير بالسرا◆وحـرب عناله بالفواد شكاه
- 85أقفا مثل ماجا وهو يشكي العمى◆اقفا مـن الذله يحر قناه
- 86عيب على مثله لياهد ينثني◆يبدل مـن عقب الهدير إرغاه
- 87وأبن صباح أذروه وبن خليفة◆رمـح آل زايـد ظلهم بافياه
- 88اخذ ثارهم من ضدهم يوم كادهم◆رمـح مـن العز القديم عصاه
- 89يشهد به الهدار واللى جرابه◆دخيلهم ثـاره عطوه إقضاه
- 90فكو حقوق للدخيل ابن وايل◆جميلية نالوا حقوق وجـاه
- 91من ضرب من لا صددوا عن حريبهم◆يصكون باجباه الخصيم جباه
- 92دخيلهم باعلى السماكين منزله◆لـه بين نجم الفرقدين متاه
- 93كنه بجنات تظله غصونها◆والنايف الطايل يحل ربـاه
- 94تعلوا لعرش المجد من قو عزمهم◆مصابيح ظلنات تريح رجاه
- 95مراجيم عدوان مرابيع ملتجى◆ليا جف من وبل المزون ثراه
- 96إلى قطبت عسر السنين وجذبت◆ولاعـاد يذكر بالرياض كماه
- 97يهوشون بوجيه تكاشف من النقا◆والضيف مايقصر عليه إقراه
- 98ياناشد عني وأنا لي قبيله◆قصر الندا زادو عليه إبناه
- 99اشادوا فعول بالفضايل وسلمهم◆للجار كـل باللسان حكاه
- 100بني زايد ادوا جارهم من جداره◆ولا أحـدٍ مـن اسباب الإله وداه
- 101لهم وادي سهل الدروب ودونه◆نـار ينزح عـن احماه سناه
- 102سناه مصقول الحديد الصافي◆وعـزم القلوب الصاطيات لظاه
- 103عذروبهم للضيف ترخص نفوسهم◆والجار مضمون السلام إغطاه
- 104وجه الندا يندا كمت ماطر الحيا◆يبين عند الموجبات نـداه
- 105تعييي على الشيمات حفاظة الشيم◆ووجيه الندا لازم يبش حياه
- 106قصيرهم يارد على العد قبلهم◆ولاشكا يـوم الـورود ظماه
- 107إن زادت إسنينه تجدد معزته◆وكـلٍ خطا جـاره عليه رفاه
- 108وان ذبـح خير عند وجهه◆وكسب الفضيله بالحيلة إمناه
- 109على الطيب شبان وشيب◆تزاحموا والطيب يتعب للرجال مداه
- 110دواسر كنيوا على دوسر الفحل◆واسـمٍ على فعل يبين إقداه
- 111من الهضب للافلاج مكدين◆ضدهم وحريبهم مـر المذاق عشاه
- 112وادي العقيق مطهرينن جنابه◆ولا ديـس بين العالمين إحماه
- 113من عصر ابن بدران هذي ديارهم◆والـدار محدٍ للخصيم عطاه
- 114راسين مثل جبال هضب آل زايد◆وهـم ليا شـان الزمان إحماه
- 115حموه يوم إن القنا يقرع القنا◆ولمثلهم رب العباد بـناه
- 116من الفرعة العليا إلى الخرج◆حدهم بـه الجار ما كِّدر عليه صفاه
- 117الدار ما تصلح لمن لايصونها◆الـدار عـوره والرجال إرداه
- 118دارٍ خذوها بالمراهيف عنوه◆وهم نورها الصاطع ينير ضياه
- 119بني عقيل أخلو مغاني ديارهم◆بعد دمهم بأرض العقيق سقاه
- 120من غلمة ما باعوا العز والشرف◆يـوم الـردي فعل الجميل نساه
- 121تشهد مشاريف اليمامه بفعلهم◆فـعل تـعد العالمين ثناه
- 122هرج بفعل يشبه الماس بالذهب◆وهـرج بلافعل يقال سفاه
- 123نعد قـول ماتكذب مثايله◆راويـه أصدق من طيور قطاه
- 124نعد مجد الطيبين و فعلهم◆واذكـار فعل الطيبين طـراه
- 125فعلٍ على فعلٍ تحاكا به العرب◆مجدٍ يكذب مـن يعد ثناه
- 126من رام فعل الغانمين وشانهم◆السيف يـروى من عداه شباه
- 127من رام فعل الغانمين وسلمهم◆الجار عن الخصم العظيم وقاه
- 128من رام فعل الطيبين وقدرهم◆يبذل لياضاق الزمان قضاه
- 129ان كف همال الحيا وامحل الوطا◆وشحشح عن الطفل الرضيع غذاه
- 130يكرم لياضاقت على الناس وامحوا◆ويصبر ليامن الزمان وطاه
- 131النذل مايقدر على طيب الثنا◆والليل مايشبه صدوق ضحاه
- 132يجود الفتى بالجود من زايد◆الحيا يخاف مـن العايبات قضاه
- 133قولوا لطلاب الثنا يتبع النقا◆ولايلحق العرض النزيه شناه
- 134ومن سار بدروب الردى زاره الخنا◆ويلبس من اسلاب السواد كساه
- 135ابعد عن الانذال وترك ديارهم◆يفكك مـن الوجه الخبيث نياه
- 136الاجواد آيات الندى في وجيهها◆والانـذال شـرى ما يذاق جناه
- 137الاجواد ما تنوي بك البوق والردى◆والانـذال عيب مـا يعد غياه
- 138الاجواد فعل الخير لذة نفوسهم◆والانـذال ملزوم يشاف خناه
- 139الاجواد جنات تعاقب أنهورها◆والانذال صلدا من صخور صفاه
- 140الاجواد تاصف لك طريق يدلك◆والانـذال لعسرات الدروب إقداه
- 141الاجواد مثل الورد عطر روايحه◆والانـذال **ومٍ يطير سفاه
- 142الاجواد فيهم باب يسر ومعزه◆والانـذال عسرٍ ما عليه شفاه
- 143الاجواد زلة جارهم يدمحونها◆والانـذال تجزا الاقربين جناه
- 144الاجواد مثل النهر حلو شرابه◆والانـذال صباخٍ مـلاح مـاه
- 145الاجواد تبذل فضلها دون عرضها◆والانـذال دنسين العروض عراه
- 146الاجواد مثل الريف سعد سعوده◆والانـذال قحط الزمهرير شتاه
- 147الاجواد تامن شرهم وانت عندهم◆والانـذال شـر مايطيب بـلاه
- 148الاجواد مثل الصبح تمشي بنوره◆والانـذال ليلٍ مظلمٍ ممساه
- 149الاجواد حبات الندى يبذرونها◆والانـذال تبذر بالرخيص رياه
- 150الاجواد فعول الخير ما يجحدونها◆والانـذال حـزم مايطيب حفاه
- 151الاجواد ماتلحق عزيز مذمه◆والانـذال تنطق بالصديق زراه
- 152الاجواد عز الجار والضيف◆سلمهم والانـذال بعيون العزيز قذاه
- 153من طاوع النفس الذليله على الردى◆يرخص ويظهر للرجال خفاه
- 154نسى الجار والضيف العزيز جفاه◆تقصر عن العز الرفيع إخطاه
- 155يموت طلاب التماني على الشقا◆سـراب دو والـظلال غطاه
- 156يموت طلاب التماني بحسرته◆وكثر التماني ماتعيد صباه
- 157يموت طلاب التماني ومثله◆مـن يرجي الحنظل يزين نماه
- 158يموت طلاب التماني ومكسبه◆كما صايحٍ صوته يرد صداه
- 159أبـا التماني لاتمنى وخلها◆تـرى التماني والحلوم أشباه
- 160يقولها لك من هوى القلب◆عذبه وداعـي غرامه للغرام دعـاه