الله كفيل الناس وارضه وسيعه
محمد الأحمد السديري17 بيت
- 1وراك تورينا الجفا والقطيعه◆وحنالك اطوع من بنان اليديني
- 2نشري رضاك وكل شي نبيعه◆وحياة ربٍ يبعث الميتيني
- 3ونمشي بشف ارضاك وامرك نطيعه◆اللي يصيبك عارف انه يجيني
- 4لـو ان نفسي للمعالي رفيعه◆بالعين اجلك جاعلك لي ضنيني
- 5ايامنا هي والليالي سريعه◆ومـازان بالدنيا لزوم يشيني
- 6الله كفيل الناس وارضه وسيعه◆عالم خفايا نية الجاحديني
- 7لابد من يوم نشوف الشنيعه◆ونتبع طريق اجدودنا الاوليني
- 8الروح تبقا لين ياصل وديعه◆والاجل مكتوبٍ بعالي الجبيني
- 9نفسي لها عشرين عام وجيعه◆ويشهد علي ماقلت عوج السنيني
- 10الى تبها نجد واقبل ربيعه◆نشوف شيٍ فطَن الغافليني
- 11وبغضت شوف الناس جمعا جميعه◆وقمت اتمنا منزل الفرقديني
- 12من ربعنا الادنين شفت الهزيعه◆وقد قالوا الناس المغطا يبيني
- 13وشفنا الحقايق واكتشفنا الخديعه◆لاشك ضاع الحق يالفاهميني
- 14حقي غدوبه مبغضين الشريعه◆غدوبه الانـذال يالغانميني
- 15وبنيت رجم وقلت هذا مضيعه◆حتى يعرفون الخطا اللا حقيني
- 16لو هو بالايدي كان اخذته قريعه◆غصبٍ على الحساد والمبغضيني
- 17وقمت اتذكر فعل راعي البديعه◆وقتٍ زمانه شيب المصغريني