اقطف زهر مالاق
محمد الأحمد السديري26 بيت
- 1لاباس يا لابس من الود سربال◆ياللي بيتك حكمتك فاتلتها
- 2مثل اذهب ما ضعفت بيت ولا مال◆من الجواهر فيض عقلك نحتها
- 3ابيات عن شعر لغيرك بها انفال◆ابدعت بأولها وفي تاليتها
- 4ماجور يا شاكي هوا زين الاقبال◆الجادل اللي لك تعوج ارقبتها
- 5الياس لا يبعدك يا ذرب الافعال◆اتعب قدم رجلك على ما شتهتها
- 6الرجل سقها بالرجا وطلب الفال◆وسعدك باتلي خطوة قد خطتها
- 7وانا معك بالحال والراي والمال◆وراج عسى المولى يحل شركتها
- 8اقطف زهر مالاق والعمر باسمال◆والحق هوا روح لروح بغتها
- 9عب الهوا عبه على كل الاحوال◆واخلص لمن بالود عينك رجتها
- 10اشرب يابن سلوم من در الاهجال◆والنفس وصلها لدار دعتها
- 11النفس روضها والايام باقبال◆توذيك كان ان الهموم سهجتها
- 12وعن الكرا عيني بها ذعر وجفال◆وشواطن من سهرها داعبتها
- 13شواطن ما بين نازل ورخال◆البارحه يوم الطواري حدتها
- 14يوم انها شافت غريبات الامثال◆ابيات من نظم غريب قرتها
- 15تاهت لنجم الدجى بالليل تختال◆وسبع النعايم كنها حاضنتها
- 16العين هاجت واصبح القلب يجتال◆وذكرت دار قبل رجلي وطتها
- 17انشد وتلقاني من الحب مكتال◆وعيني غزيرات الدموع ذرفتها
- 18يجذبني الهاجوس في راس ماطال◆وكن هضبة رجل العنا مشرفتها
- 19وقلبي بحرف الواو والدال مازال◆يهيم برياض الغرام وسعتها
- 20لو كنت بايام شديد بها اللال◆النفس لذات الهوا ما نستها
- 21عسى يسقيها من الغيث همال◆من مزنة تمطر والأخرى قفتها
- 22شوف الزهور وريحها ينعش الحال◆وكن غرسة بيدي قطفت ثمرتها
- 23للريم فيها يابن سلوم مدهال◆وغر المزون بوبلها عللتها
- 24شاحت لها عيني وقلبي لها مال◆تذكرت خلانها واعرفتها
- 25شاحت تراعي للروابي والاقذال◆بايام طرد الصيد ياما رقتها
- 26بالقلب ذكراها صبغ صبغة الخال◆في خد عذرا خلقة الله زهتها