يا شعب قوم فتح عينيك
محمد ابو يوسف25 بيت
- 1الشعب صوته صار حزين◆وبيشتكى لرب الفلق
- 2يا مُرَشّحِين حالنا ضنين◆ووطنا مَقْتُول مِنْشِنِقْ
- 3السهم طاش والناس عِطَاش◆لمصير جميل من غير قلق
- 4يا شعب قوم فَتّح عنيك◆اوعاك تِخُش فى النَفَقْ
- 5ولا حد يوم يضحك عليك◆ويعيد نظام عميل سَبَقْ
- 6يا شعب لو ترضى الفلول◆هترمى روحك فى الغَرَقْ
- 7اسأل شفيق يوم الجمل◆ممكن يجاوبك لو صَدَقْ
- 8مين فينا يا خلق انقتل◆مين أشعل النار مين حَرَقْ
- 9وف بور سعيد أيه حصل◆الدم سايل ع الطُرُقْ
- 10حِمِى الوَطِيْس والموت فِطِيْسْ◆والكل مشغول بالسبق
- 11واعلامنا داير ع الشاشات◆ع الحق عَمّال يِجْتِرىء
- 12يا مًُصَوِّتِين استيقظوا◆السهم م القوس قد مَرَقْ
- 13والمسلمين الطيبين◆وابناء يسوع ع المفترق
- 14يا شعب قول أمرك عجيب◆واسْكُب آمالك ع الورق
- 15عايزين مدارس للولاد◆تَعّدِّى بينا المُنْزَلَقْ
- 16عايزين مصانع واقتصاد◆عايزين حضارة تتْنَشَأْ
- 17عايزين جيش يحمى البلاد◆ويعيد ماضيها اللى انْسَرَقْ
- 18عايزين نقول يا زمان◆سَطّر تاريخْنَا ع الملأ
- 19عايزين قلوب للحق دين◆وتقول آمين للى خَلَقْ
- 20عايزين ف يوم النور يقيد◆ونِفُكْ روحنا م القلق
- 21ولا حد يِطْعَن شعبنا◆فى الضهر ثم يِخْتِبىء
- 22عايزين يا شعب تتحِكِمْ◆بالفَجْر والنور والنَبَأ
- 23مصر كنانه ف أرضنا◆مصر أمانه فى العُنُقْ
- 24مصر جميله يا شعبنا◆اوعوا تسيبوها تِنْحَرِقْ
- 25
-----------------------