النيــل والزمـن
محمد أسامة البهائى45 بيت
- 1النيـل والزمـن◆النيل رحال في السنين م الأزل
- 2عايش فى وسطينا حقيقة ومَثـَل◆وعمره عن حد فينا ما أنـعزل
- 3لا، كـَل في يوم ولا انهزم◆فارد في الأرض بالخير والنعم
- 4وراضى بكل اللي بيجرا له ... وساكت◆ولأنه مايهواش البور مايغواش العدم
- 5ومهما شاف م الخلق ويشـوف◆مايتمناش يجى الوقت و يترد م
- 6وعـدناه ياما وكل وعد مخلوف◆لكينه هايفضل النيل الشامخ الأصيل
- 7اللى عمره ما ينهزم ولا يتهدم◆النيل دايما حاضر
- 8والنيل عمره ما هرب◆وياما دارت ع البيوت قرب
- 9وكان السقا يرضى بقليلة◆وياما شد من حيلة
- 10لجل مايباتش بيت عطشان كرب◆والميه كانت ميه المحياه فى الحر
- 11وفى البرد زمزم على سلسبيل◆المشربيات عمرانة بقلل نسمة التراسينه
- 12والحوارى ماتـخلاش من سـبيل◆لكل عابر سبيل يروى عطش السكة
- 13والغيطان اللى رواها النيل طراحه◆بعرق رجاله راضعه م النيل أخلاصه
- 14ومصاطب اللمة اللى تتراحم عليها القلوب◆زى خلوة الجامع حاضنة اللى بيتوب
- 15ومكانتش المعاصى تتخفا ورا توب◆وتلعب الناس بالناس ع الشناكل بريح هبوب
- 16كانت الميه كما الميه بتوهب لحياة الخلق حيا◆كما النيل اللى اتوهب من رب الوجود والحيا
- 17تدور سواقى الغيطان لجل تنول الرضا◆و وابـور طحين البلد فرحان بخيره ولايعصلجش
- 18وبالمواسم يفيض النيل الفيضان◆لا انتظر زفه جميلة العرايس
- 19ولا خروج الناس على سنجة عشرة◆بسعف النخيل مطبلين ومهللين
- 20والكام نهار اللى غابت فيهم الشمس◆كان النيل بنفس الوداعه
- 21ونفس رتابه مجراه والقوة◆كانت الشمس تنكسـف م النوه
- 22وف ليالي صفا العشق◆يتخنـق ضي القمرخنق
- 23ما ترجع له روحه إلا◆لو شاف محايله ومداديه
- 24وشاف صورته ع المايه◆والداء على قد ماهوا
- 25في قلب القلب كنا بندفـنه◆لجل ضحكة لحظة بشوق ولهفه
- 26نصبر ونغنى لحزننا الدفين ونهننه◆والخوف يصور ويجسد بخياله الجامح
- 27ندهات النداهة عروسة بحر النيل الكبير◆ونرخى عيوننا بدمعاتها الغزيرة
- 28تنطلق في عروقنا شرايين غضب◆ونشكل الحلم الحقيقى بأيدنا نفصل تفاسيره حياه
- 29ونعيشها حياه فى حضن النيل◆وأحنا بنعزف آهات موالنا والغوايات
- 30وكان للبدن نسمة ارتياح يحس بيها هوا◆ويعرف كيف يبقى الدوا بعصارى النيل
- 31ويهز بكفوفه القـلق والحزن ع الضفتين◆ويضمد جراح الزمن فينا
- 32والولاد تشرح القلب العليل طلعتها تشق الصخر◆تنقش دمها حكايات للمجد والأجيال سطور وسطور
- 33ومنين ماتلمح عينيك تتوه في دواير دهشتك بالفرح◆وياما جاد الزمن ع الخلق جود وكرم
- 34اتبدلت لايام بوجعها وعذابات الأرض متراكمه ومتجمعه◆وداق جوانا الخلا الفسيح الرحب ع الاخر
- 35وبنسافرفى البنايات الخرسانه والاختراعات◆وبندور للفطرة والطبيعة ع الضد والموات
- 36وبتسافر في حشانا خطى الأيام اللى بتزيد مرار◆تتوه في الرحلة أحلامنا المسافرة خلف خلافنا
- 37تختفي المعادن وتتلون ملامحنا◆ولما نكون ساعات احنا
- 38كتيـر ما نعرف لفين روحنا◆والسفر مسافر بينا وبهمومنا وجروحنا
- 39على قد غربتنا في روحنا من توهتنا◆نخرج للبكا زى الضى ماتلمناش مطارحنا
- 40وفي قلب عجلة الزمن الدواره طواحينها◆نستغرب وجع غربتنا المريرة ونتباكى
- 41ما نحس بالفرقه غير والألم حارق في القلوب◆وكل نهارات الشمس غروب وهروب
- 42لترحال محفوف بالعدم◆يرحل كل مين خطا بقدم
- 43ولا يتبقى غير حزننا الدفين◆يصاحب كل خطوة بنخطيها
- 44لجل مايصفى فينا بالمعاد والأجل◆اللى راقد ع الدنيا واللى آخدها بعجل
- 45وتفضل يانيل توهبنا الحياة بالأمل◆عامية مصرية