مقاطع من أغنية الرصاص
مجدي نجيب133 بيت
- 1لو رصاصه واحده◆رصاصه واحده .. معايا
- 2رصاصه، أحمي بلدنا◆رصاصه أحمي حبيبي
- 3وطني .. حبيبي◆وتفضل .. ولو رصاصه
- 4رصاصه واحده معايا◆الطلقه ح تكون البدايه
- 5الطلقه ح تزغد في عُرسي◆الطلقه راح تقدر تجاوب
- 6الطلقه ح تزغرد في أفراح البلاد◆الطلقه ح تغنِّي في أعياد الميلاد
- 7الطلقه بتقرَّب ميعاد◆الطلقه راح تحمي الولاد
- 8ويتولد ناس جُداد .. جداد◆وتقلع الأرض الحزينه
- 9ملابس الحداد◆لو رصاصه واحده معايا
- 10لو رصاصه تانيه تنطلق◆رصاصه تالته تنطلق
- 11رصاصه رابعه تنطلق◆رصاصنا احنا كلنا
- 12الدنيا من جديد .. يا خلق،◆الدنيا تتخلق.
- 13معنى وجودنا◆معنى سلامنا يتخلق
- 14لآخر طلقه في صمودي◆باحفر معنى لوجودي
- 15ولو تنزف .. وتنزف جراحي◆الكلمه ح يقولها سلاحي
- 16.. وتمر أنغام الصور◆واحد جنب واحد جنب ألف
- 17الجميع .. في الصفّ◆الشيوخ والولاد والخريف والربيع .. في الصف
- 18.. وعلى الوتر◆تعزف الغنوه الرصاص
- 19الرصاص رايه◆رايه فوق سدر النهار
- 20رايه بتغطي المرار .. وزحمة التكرار◆والربيع .. والخريف
- 21والشتا.. والصيف◆صف .. ورا صف .. ورا صف
- 22والشجاع .. و الجبان .. في الصف◆راحوا يقطفوا شجر النهار
- 23ولما كانوا بينزفوا◆كانت بتطرح من فوقيهم غناوي النار
- 24وكانوا بيزرعوا مطرح دمار الحرب،◆نهار الانتصار
- 25اتشردوا من كل وطن◆أصبح ولادهم و أولاد ولادهم،
- 26يشحتوا جوه وطنهم .. وطن◆لكن ما اكتفوش بالحزن
- 27ما لبسوش ملابس الصمت◆كان حلمهم بيحلم بطلقة الرصاص
- 28الحرب .. واجب◆ومصر فوق العين .. وفوق الحاجب
- 29وطني حبيبي◆واجب يا إنسان الزمن الحاضر
- 30يا إنسان الزمن الجاي◆دوّر باستمرار عن سكه
- 31وازرع فيها جناين ضي◆لأجل سلام الدنيا يعيش
- 32لأجل ولاد الدنيا تعيش◆لأجل وطنَّا
- 33يفضل رافع راسه .. رافع راسه في وسط الدنيا يعيش◆في الحرب يا وطني تملي يعيش
- 34إنسان الزمن الحاضر◆إنسان الزمن الجاي
- 35"تنساني دراعي اليمين◆لو نسيت القدس"
- 36تنساني عينيا لـِ تْنين◆لو نسيت القدس
- 37ينساني الفرح .. والنهار◆وضلة الديار،
- 38وَمُوت في الزمن وحدي أموت◆مُهمل بلا تواريخ
- 39تنساني الحضاره .. والتاريخ◆تنساني السنابل والغيطان وشجر التوت
- 40تنساني الشموس والنجوم .. و القمر◆تنساني بسمة الولاد
- 41وطرحة الزفاف◆تنساني أفراحي
- 42تنساني الشوارع والبيوت والحب◆بيحلموا ببكره اللي جاي
- 43بكره اللي طالعه شمس يومه،◆طالعه تتبسّم فوق شموس الضي
- 44نفسي أغنيلك يا شعبي يا بسيط الشكل والمعنى◆نفسي أغني من زمان
- 45نفسي .. أغني و مش حزين◆نفسي أغنيلك نغم فرحان
- 46نغم يرقص مع صوت الأمل ويسجد مع تكبيرة الأدان◆نفسي أغنيلك يا شعبي من زمان
- 47أي إنسان بيحب بكره◆ويحب شمسه تنوّر الجايات
- 48مش بدم الأمنيات◆مش بجرح الأغنيات
- 49إنما تفضل كلمته زي الرايات◆تفضل كلمته هيا الرايات
- 50مَثَلْ .. وقالوه◆الأب .. عن أبوه
- 51مَثَلْ .. وشافوه◆ولو اتقتل ميات
- 52ما بيقدروش يقتلوه◆وف ضل الحريه بيرتاح الناس
- 53يتغطوا بغطاها◆الأبيض والأسمر والأصفر .. كل الأجناس.
- 54على كلمة حريه،◆بيفوق الناس
- 55أنا مصر يا ولادي، أنا باصْحى من تاني◆نزْف الجراح
- 56صوت السلاح◆أحلى نغم في وداني
- 57تسلمي يا بلادي .. تسلمي◆بارسم صباحي من دَمِي
- 58الله أكبر يا بلادي تسلمي◆يا دْراعات الرجَّاله .. تسلمي
- 59الله أكبر يا بلادي ..◆م الدم طالع نهار
- 60صوت الرصاصه النغم ..◆والخلوه اصرار
- 61الله أكبر يا بلادي◆م الجرح طالع ورود
- 62صوت الرصاص بيغني◆وبيهز الوجود
- 63هنا فوق أرض سينا◆بنعلِّم الليل ع الجرح يصحى
- 64بنعلم الحزن الابتسام◆بنعلم النار تروي نهار الانتصار الجاي
- 65بنعلم الحجر اللي مرمي،◆بنعلمه لغة الكلام
- 66هنا الأرض و التاريخ◆والحلم و المستقبل،
- 67فارد ايديه لينا◆في القلب الوطن
- 68في القلب سينا◆النهارده يا بلادي
- 69كل شيء أصبح لُه معنى◆نور الصباح
- 70ضحْك الولاد◆طَعم الميعاد،
- 71أصبح له معنى◆السلام في عصرنا
- 72السلام هنا .. أنا باصنعه◆ونا ف ايدي السلاح
- 73ونا في قلبي شجرة زتون خضرا◆وطالع اسم مصر
- 74طالع م الجراح◆طالع يغني:
- 75ما قلناش أبدًا نسينا◆وطول ما النبض فينا
- 76في عيونَّا سينا◆خيامنا .. ما فيهاش جناين
- 77خيامنا .. مالهاش مداين◆وقمرنا ع الخيام
- 78بندقيه وسلام◆بندقيه ف سدر ليله مُعتمه
- 79وسلام لكل عيله منِّنا◆قلبها اتحوّل خناجر
- 80وردها بيطرح خناجر◆علشان خيامنا
- 81مافيهاش جناين◆العدوان أفظع شيء
- 82ولا شيء ..◆بيصدّ العدوان غير ايد الرجَّاله
- 83إن البشر يمشوا وفوق سماهم أسامي ولادهم،◆مرفوعه زي العلم
- 84يفوتوا ف كل صعب◆يدوسوا .. ع الألم
- 85إن ف ليالي البرد◆نتغطى بدفا الحريه
- 86وإنّ لما نحب◆يكون حبنا حريه
- 87في الحرب ...◆ولما يرسم دمارها ورمادها على الوشوش كلام تاني
- 88ما نمطش في المعاني◆ما نقولش معنى، ملوش تاني
- 89ما نتكلمش كلمه ع الجراح تنزف .. تعاني◆لغة الرصاص
- 90لو قلبي يعيش في الآه◆ويهرب الربيع
- 91ونا باحلم بالبراح◆بالدنيا .. وابتسامه
- 92وأعدي ع الجراح◆يا دنيا .. يابتسامه
- 93كل لحظة بافتكر مصر التاريخ القديم◆مصر التاريخ الجديد
- 94طعم الأمل موجود◆"وف قلب نار الحرب
- 95بتطرح الورود"◆بس لازم تعرفوا
- 96تعرفوا تقتلوا الكلمه الدخيله◆تعزلوا الكلمه الغريبه
- 97لازم تعرفوا◆إن الدموع والكلام
- 98ما يقدروش يخافوا ع السلام◆ولا بيرجَّعوا الأرض السليبه
- 99سلاحي .. صبَّاحي◆بيكتب جراحي
- 100فداكي يا مصر◆يا درعي .. يا سيفي
- 101يا لقمة رغيفي◆بقول: يا بلادي
- 102في لحظة ميلادي◆تعيشي يا مصر
- 103اقفلوا الكراريس، وانتهى درس النهارده◆لكن عشان تحيُوا ما تنسوا اللي حصل
- 104افتحوا عيونكم كويس واعرفوا◆إن مطرح كل ورده
- 105امبارح .. والنهارده◆كان فيه شهيد
- 106كنا .. كلنا◆وإحنا بنحارب كل لحظه
- 107بندوس في كل خطوه ع الخرافه◆على كل شيء .. يكرهه الأحباب
- 108على الأحزان◆على التواكل
- 109على أي شيء ملوش معنى◆ضحكه .. جوه دار
- 110مفيش محال،◆طلعة النهار
- 111رنّة الأوتار◆الناس في الشوارع
- 112الناس في الديار◆الحياه في عيون ولادنا
- 113ايدي على سلاحي◆في قلبي شجرة زتون خضرا
- 114باحب الأرض ليَّا◆باحب الأرض تبقى أرضي أنا ليا
- 115باحب أسلّم بإيدي◆أسلِّم وأبوس ترابها
- 116أتعب عليها◆أنزف عليها
- 117و ف قلبي شجرة زتون خضرا◆يفضل في قلبي السلام
- 118ويفضل في ايدي السلاح◆جمَّعنا النضال ع النصر
- 119باغزلك في توب النصر◆ما تستغربوش
- 120لحظه زي الحلم ما بتحصلش◆لكن الأكيد
- 121إن اللي اترسم فوق الوشوش◆كان زي شعلة ضيّ
- 122كان التاريخ الحيّ◆و نبض التاريخ الجاي
- 123ارموا غصون الورد◆شيلوا هدوم الحزن
- 124يا كل الناس البني أدمين في كل جهات الأرض◆أقفوا دقيقه حداد
- 125رَاحُم ولا رجعوش◆راحوا يجيبوا نهار الدنيا
- 126راحوا، عيونهم فيها نهار◆بنقف لهم مدى الحياه
- 127نقف وإحنا حاضنين السلاح◆اللي استشهد من زمان
- 128واللي استشهد النهارده◆اللي راح يتولدوا من جديد
- 129للزرع اللي اتحرق◆للغيطان اللي دبلت
- 130والغيطان اللي ح تزهَّر◆كلهم .. واقفين لهم .. مدى الحياه ..
- 131مش بس دقيقه.◆يا كل الناس البني أدمين .. يا شايلين ع الكتف سلاح
- 132الجرح صباح◆وبيطلع منّه المستقبل
- 133
حاضن في عيونه الخير .. والأفراح