صوبنا
مانع سعيد العتيبة8 بيت
- 1صوبنا صوبنا يالزين كله◆صوبنا يا عويد الخيزرانة
- 2كان ما لك معزّب في المحلة◆إقلط ولك معازيب وضِمانه
- 3تَبزِغ نجوم وتبين الأهلّة◆لكن البدر يغرينا بيانه
- 4وانت بدرٍ نهب قلبي وشله◆شل قلبي ولا ردّه مكانه
- 5والعشق ما نبدّل في سجله◆وانته معزّبي وكاسب رهانه
- 6قلت من يَخفي عيونه فطن له◆قلبي اللي عشق حبه وصانه
- 7تبغي تعرف قدرك من وصل له◆و تَعترض لي دلع والا ميانة
- 8دمت لي حب ما قلبٍ يشله◆ودمت لي عشق فارق في زمانه