على النوايب يالعبودي
لفى الهفتاء12 بيت
- 1على النوايب يالعبودي لا اقبلت جعلك قوي◆اقبل عليها واستعن بالله واثبت واحتزم
- 2الوقت لو خلّا النوايا المستقيمة تلتوي◆ابشر بمن لا قال لك بالطيب كلمة يلتزم
- 3لا حان ميقاف الحميّا راسه الحيّ حْمُوي◆ان سار في علمٍ ظفر وان ردّ له رايٍ حزم
- 4لا تشغلك ناسٍ لها في ظلمة الديرة دوي◆ذا طبعها من قبل عصر الأنبياء أولي العزم
- 5وانت اعتبر ما قيل لو يحبطْك دعمٍ معنوي◆وتشوف وشلون انتصر جنكيز وشلون انهزم
- 6آخر طموح الإمّعة يلبس ثياب الفهلوي◆والحرّ عن مثله يشوم ولا غضب مرّة جزم
- 7من تحسب انه نجمٍ اصبر لين بكرة ويْهَوي◆تمثيل دور العَملَقة ما غيّر بواقع قزم
- 8حتى ولو لك قلب غاوي عارف ان عقلك سوي◆يا شبل من يقلط على العليا طبيعة ويْعَزم
- 9التجربة برهان وافضل درس درسٍ دنيوَي◆البعض يستاهل قدر والبعض يبغى له خزم
- 10من لا عرف وجه العدو ما يعجبه وجه الخوي◆حتى لو انه مثل اخوه ودون ابن عمّه لزم
- 11العام فوق الحزم دايم نسمع الذيب يْعَوي◆واليوم مات الذيب لكن هو بقى عقبه حزم
- 12اقولها والوقت سيفٍ من دمانا يرتوي◆ولا نقص من عزمنا بالعكس زوّدنا عزم