عابر سبيل
لفى الهفتاء33 بيت
- 1يا فريد الحسن ما بالحسن غيرك فريد◆بسّ معكم شربة الما مثل علة نحر
- 2النوايا سود والموت أقرب من وريد◆والإقامة عند من لا يقدّرنا سفر
- 3هل بعد ضيقة مداهيل ذي القربى مزيد◆عدّني عابر سبيلٍ إذا صلّى قصر
- 4ملّني صبري متى يقرب الفجر البعيد◆يا بحر مدري سراب اوّ انا شوفي شجر!؟
- 5القهر يمكن إذا سادت الدنيا عبيد◆بسّ والله ذلّ الأحرار ما مثله قهر
- 6كلّ منهم صار باشا مصر كخورشيد◆وخورشيد اليوم ما عاد هو باشا مصر
- 7أوقدوا بي نار وازعم بأني من جليد◆كلّ موضع بظهري يشتكي طعنة غدر
- 8لا تكلّمني عن الصبر باليوم العتيد◆هو بقى شيٍّ حبيبي يسمّونه صبر؟
- 9آه من ما فيّ لا تحسبه داءٍ حميد◆وش تقول بعالمٍ غيبّوا شمسي ظهر؟
- 10عزتي للي عليهم نقل سيف الوليد◆عقب ما كانوا إذا ضاقت الدنيا ظهر
- 11هزّت العاقل نعم هرجةٍ جت من بليد◆ان سكت عنها احترق وان تعرّضها خسر
- 12ايه ما لي مع شيوخ الرضا رايٍ سديد◆خلها تبكي تماضر على اخوها صخر
- 13يا فريد الحسن نارٍ تجيني من بعيد◆خير من جنة قريبٍ بلا عزّ وقدر
- 14غربتي عن ديرةٍ غرّبتني يوم عيد◆قل متى يطلع هلاله إذا عندك خبر؟
- 15ايه اريدك بسّ ربي يسوّي ما يريد◆ما منعني من قبل غير قلبٍ من حجر
- 16والله ان الوحدة احيان من حظ الوحيد◆يوم يلقاها حذر لا بدا منهم خطر
- 17الهوى والليل والبين والبرد الشديد◆جدّدت ذكراك لي يا قمر خمسة عشر
- 18أتذكّر يوم للذكرى لنا ساعي بريد◆واسمع بصدري صدى صوت نوماس وفخر
- 19كم صدفني هايمٍ بين احاديث وقصيد◆قال مَن؟ قلت مِن لا ذكر مثله بشر
- 20ايه من لا غاب لاسمه خبر مجدٍ تليد◆وان حضر يكفي ولو كلّ مخلوقٍ حضر
- 21ما يداوي جرح قلبه لا دمى غير النشيد◆يوم تجذب عندل الجنّ من صوته شقر
- 22لي مثل قول ابن صيفي ولي فعل الرشيد◆للخوي جنة عدَن للعدو حفرة سقر
- 23قال تاخذ قلت يمكن ولكني زهيد◆قال تعطي قلت افا وابك انا وافي شبر
- 24قال وش لك بالشعر كبن كلثوم ولبيد◆قلت ما قالوه شاعر وينحت من صخر
- 25اللقب طوفان شعرٍ معي ختم المريد◆كم على عدوِي عدا رهط عبقر لا نفر
- 26لو عطاني الحظ ما اعطى بن الصمة دريد◆كان ما تسمع سوى شعر طوفان الشعر
- 27قال عابر قلت عابر عسى عمرك مديد◆عن بلادٍ دورها صارت اضيق من قبر
- 28يلحي الله بينهم ما بقى عبدٍ وسيد◆قال لا ما من مفر قلت كلا لا وزر
- 29دام رجلي تضرب الأرض فاني مستفيد◆قال طع شوري ما بعْد العسر غير اليسر
- 30قلت دوم اقول بتهون لكن لا جديد◆هي كذيّا قال قل لا ضرار ولا ضرر
- 31قلت عيّا لا يجي بينهم يومٍ سعيد◆باخذ الرحلة بحر لو مَ انا راعي بحر
- 32قال بالغربة فقر قلت لي ربٍ مجيد◆ما بعد هذي فقر صدق لا قالوا فقر
- 33لين ما خلّيت من بينهم حسنٍ فريد◆يوم معهم شربة الما مثل علة نحر