النايفة
لفى الهفتاء9 بيت
- 1يا ليل يا من لك تقول اهل الغرام ظروفها◆لو كانت اجوائك لها ما هي بدايم كايفة
- 2جيتك معي آخر رسالة ما جهلت حروفها◆منها عيوني وين ما لدّت نظرها عايفة
- 3رسالة اللي ناهية فوق الوصوف وصوفها◆النايفة والموت والله من حروف النايفة
- 4تقول من دون اللمى فرقا تسل سيوفها◆مهما نزيّفها قسم بالله ما هي زايفة
- 5شف جنتك يا نور عيني يوم جيت احوفها◆دقّت ببالي ساعة الذكرى واثرها طايفة
- 6حتى تلاشت من مضامين الخيال طيوفها◆أكذّب عيوني وأصدّ شوي لو هي شايفة
- 7وهذي ثلاث سنين راحت ما قدرت اشوفها◆والله مدري عايفة للوصل والا خايفة؟
- 8واليوم كم فكرة بديت اصدّ كل ضيوفها◆لعيون من في غيرها فكرة غرامي هايفة
- 9واقول يا جعل المشاعر باينٍ معروفها◆والنايفة مهما قسيت اليوم تبقى رايفة