البارحة حلم النيا كابوس
لفى الهفتاء29 بيت
- 1البارحــــة حلــــــم النـــيا كــابوس◆من سبّتــك يالمرهـــف الحــــسّاس
- 2وينك عن الهوجـــاس والهاجـــوس◆لو تعرف الهاجـــوس والهوجـــاس
- 3بكّيتــني في مشـــــية الطـــــاؤوس◆وضحّكتــني في نفــحة النســــناس
- 4ما جيتـــك إلا والشعــــر ملمـــوس◆يا مستثــــير الحـــبر والقـــرطـاس
- 5بعلمــــك عـــن قـــصّة الملبــــوس◆من هي لها عنــــوان بين اقــــواس
- 6في أربـــعٍ جـاء صبحهن خرموس◆من نفــــث شـــقٍّ وابتــهال إليــاس
- 7يخلــــق قــدائس، ما خــلق قـــدّوس◆هذي الحقيــــقة إي ورب النـــــاس
- 8دونه من أفراس اليمـــن كـــردوس◆أسراب جــــوٍ ما تقـــول أفــــراس
- 9من قـــاب قوســينٍ وأدنى قـــــوس◆تصبـــح على المرسي أبـو العبّاس
- 10هسهاس جـــنٍ يشــــبه المنكــــوس◆ومنكــوس إنـــسٍ يشـــبه الهسهاس
- 11في جـــو عســـعس للفتى موجوس◆والشمـــس جمــرة والديـار ادراس
- 12له من فــصيل الواد حــبس حبوس◆ياخذ معــه كل ما انســـدل مرواس
- 13(من نوف والراهب إلى فــردوس)◆(إلى سجـــع كــاهن وعطر الآس)
- 14قبل الأوديـــسة عنـــد هــوميروس◆تكـــتب وخمـــريّات أبـي نـــــوّاس
- 15والديــــر والإنجيــــل والنــــاقوس◆والبــاب والقـــــسّيس والشـــــمّاس
- 16وسحـر الهوى من غانية طرطوس◆والقصـــر والســـلطان والحـــرّاس
- 17والشيـــــخ والمحــــراب والفانوس◆والـــوِرْد والحـــاخام والأجــــراس
- 18أصبحـــت نهـــجٍ بالعُـــلا مدروس◆بيــــن الثـــريّا والثــــرى نبـــراس
- 19فكّــــرت بالدنــــيا وش المنحــوس◆لا طـــــار عبّــــاس ابــن فـــرناس
- 20لقيــــت ما يصحى به المــسلوس◆من دم وائــــــل برّئـــوا جـــــسّاس
- 21العـــــام فيــــه أذيـال وأيضاً روس◆واليــــوم كــلْ ذيــلٍ مســوّي راس
- 22سيـــف التردّي يذبــح النــــــاموس◆وعــن الصحو وش علّق الوسواس
- 23وأهل الهــــوى للآلهـــة (فــينوس)◆تستنـــسخ الواقــع خيال اجنـــــاس
- 24وآخر نتـــائجها رمــــاد طــــروس◆منثـــــور عنـــــد الآنــــسة إينــاس
- 25وأنا عليـهم يــوم نــزْل ســــــدوس◆ما جـيت أدوّر رمس بين ارمـــاس
- 26غرقـــــت في بحـــرٍ من القـاموس◆لا بـــاس (طــــوفانيّتي) لا بــــاس
- 27عن ما بقـــى بالواقـــع المحــسوس◆شــــربت من كــوس المـدامة كاس
- 28لعيـون بنت الســـاحل المحـــروس◆من لفّت استبرق بعقد ألماس
- 29أذكـــيت من شعــري لهـــا قــابوس◆ما دام بأغصـــان الهـــوى مـــيّاس