ألو صباح الخير
لفى الهفتاء10 بيت
- 1ألو صباح الخير يا مْطوّل النوم◆ما ملّ خدّك عاد كفّك ومعصمْك
- 2وأنا أنام ولكن شويّ واقوم◆واتخيّلك قدّام عيني وانادمْك
- 3أقلّب الجوّال بيْدي كذا يوم◆مدري متى الوقت المناسب واكلّمْك
- 4شفني معك لو كنت أنا منك محروم◆وتقول فهمّني وأنا كيف افهّمْك
- 5إن الهوى ما هو بيوم .. الهوى دوم◆إن كان ودّك تفهم .. الله يسلّمْك
- 6قلبي كتابٍ بالهوى فيك مختوم◆أمحاك في عيني وفي بالي ارسمْك
- 7يا فكرتي لا جبتها عقد منظوم◆بأمْيِّتي بك كيف لو اتعلّمْك
- 8مشتاق لأيامٍ بها جملة علوم◆وكلمة أحبك كل ما جات من فمْك
- 9يوم احضنك ما بين هايم ومهموم◆وأقبّل عيونك وخدّك ومبسمْك
- 10ويوم إن صمتي شي ما هو بمعلوم◆أقول ناظر في عيوني تعلّمْك