ناكر الخير
عبد العلي فيلالي بالحاج18 بيت
- 1فْيُومْ مَنْ لِيَّامْ◆عَرَفْتْ دَرِّي فَقِيرْ
- 2كُلّْ رَسْمَالُو قْلاَمْ◆وْلُوحَة مَنْ قَزْدِيرْ
- 3عَلَى ظَهْرُو سَلْهَامْ◆مَنْ لَمْشَمَّعْ قْصِيرْ
- 4فَقِيرْ وْفَعْيُونُو بَسْمَة◆وْثَارْ مْعَ خُبْزْ الشّْعِيرْ
- 5مَا بَايْنَة عَلِيهْ نَقْمَة◆وَلاَ شْكَى حْزَانُو لَلْغِيرْ
- 6كَانْ حُلْمُو كُلُّو لَقْمَة◆وْجَغْمَة دَلْمَا دَلْبِيرْ
- 7مْشَاتْ لِيَّامْ بْلَحْزَانْ وْلَفْرَاحْ◆وْلاَقَاتْ لَعْوَامْ الِّليلْ بَالصّْبَاحْ
- 8صَاحَبْنَا قْرَا وَتْعَلَّمْ◆وَمْعَ لِيَّامْ دْرَكْ وَلاَّ يَفْهَمْ
- 9شَافْ جْنَابُو وَتْبَسَّمْ◆وَنْفَخْ صَدْرُو وْتْعَظَّمْ
- 10قَالْ اللهْ يَرَحْمَكْ زْمَانْ◆وْيَرْحَمْ لْبُو وْلَمِّيمَة لَحْنَانْ
- 11جْمَعْ كُلْشِي فْسَلْعَة◆وْبَاعْ كُلْشِي فْدَفْعَة
- 12نْكَرْ لَحْبَابْ وْلَصْحَابْ◆وْسَدّْ عَلْعَشْرَانْ الْبَابْ
- 13دَارْ حْبَابُو هُمَا نْسَابُو◆وْبَاعْ جَنّْتُو بَعْذَابُو
- 14نْسَا بَّاهْ وْلَمِّيمَة لَحْنِينَة◆وْخَلاَّهَا تَطْلَبْ النَّاسْ فْلَمْدِينَة
- 15صَاحَبْنَاهَذَا مِثَالْ◆عَلَى مَا يْدِيرْ فَبْنَادَمْ الْمَالْ
- 16مَا يْدِيرْ الْجَاهْ وَالْكَلْمَة◆فَقْلِيلْ الأَصَلْ وْمَعْدَنْ الْمَا
- 17قَالْ الصَّادَقْ يَا إِنْسَانْ◆كَمَا تَدِينْ يَا بْنَادَمْ تُدَانْ
- 18وَلِّي دَارْ شِي فْوَالْدِيهْ وَالنَّاسْ◆يْدِيرُوهْ فِيهْ النَّاسْ وَالصَّبْيَانْ