طير البروج
عبد العلي فيلالي بالحاج42 بيت
- 1ملي كنبغي نطير◆كنحط فعيني حبة دالنور
- 2ونسافر بعيد فالاثير◆ونحل عيوني فلعاشور
- 3وايلا بغيت نفيق من لحلامة◆كنبدا من الاول لمنامة
- 4مولاي حفيظ ....يدور الدور◆وعز الدين على راسو مقلوب
- 5فبلادنا لحريرة فطور◆والجيب عندنا مكتوب
- 6لحمامة تـتهاود مع لحمامة◆بوعميرة مات
- 7...... ليه الحمد علسلامة◆فالطارمة دمخي حكاية
- 8كل خطرة تحنقز حدايا◆فيام الصيف ندير السبة بالما بارد
- 9او غير ندير تابهلة وكان◆كنت نلقى الخبز واجد
- 10طراحو اسـمــو حمان◆وغير باش نسمع نغيمة دلعود
- 11ما عزفها عواد◆ولا مساوية دلقانون
- 12شرمولة دلحوت مثومة حوت الواد◆من دار الحوات ولا فرخ النون
- 13والرشوق طالع ومولاي مصطفى فنهارو◆لي فيه حداد...
- 14يدوق قرطة منو لجارو◆فمنزه يطل علرياض
- 15تفوح منو ريحة النشارة◆والبنانة وشجرة بوعويد وعنقود لعنب هواد
- 16والسوسان داير النوارة◆والعرصة خارج منها الثريد
- 17لمولاي ادريس مول العمارة◆كنت نحلم ولحلامة من نور
- 18يغلب عليها شاهد لقبور◆سيدي علي الجمال وسيدي علي بوغالب
- 19وموال ساعي يقولولو هاك االطالب◆والعيد لكبير ايلا جا فالصيف
- 20والحومة كلها ثلاجة وحدة فيها◆اللحم خسر ايلا ما كلاه الضيف
- 21شوي وحمر ولي ليها ليها◆فالسطيحة كرة
- 22للرعاد ولبرق معمولة◆دار الزمان دورة
- 23والدنيا بلهموم موحولة◆غابت من الرميلة عسالة
- 24وكثرو فالزناقي البوهالا◆وسيدي بومدين ولا زبالا
- 25وقصة غرام بدات هاك اوين لكمالة◆كان يام كان من غرام زمان
- 26ملي كان بنادم عندو القيمة◆الود والصفا والامان
- 27والخاطر يصفا بكليمة◆كنت صغير وعقل الصغر تبات
- 28كنت وكانت وهذي قصة قديمة◆كانوا لولاد ولاد ولبنات بنات
- 29والراجل راجل وخا يكون لقيمة◆والنسوان يا لخوان نسوان
- 30بالجلابة يعجبوك والتلثيمة◆كان انسان فنان بالنغمة مسكون
- 31عاشق لخماص لودان◆باين فعشقو مجنون
- 32من عينيه العشق يبان◆ولعاشق تفضحو لعيون
- 33محبوبوما يتشاف بلعيان◆والزين المنظور يرجع مولاه عنون
- 34وكل الناس تولي لو خدمان◆محجوب خاطرو فالدار
- 35هاز بلحبيب ديالو الطابق◆بلحيا وزاد حاجبو لخمار
- 36والصفا والحب الصادق◆ملي يولي الطير فنصصات الليل
- 37لعشو يلقاه بالود وليفـو◆يلقى فيه لحليل ولخليل
- 38يدفي شتاه ويرطب صيفو◆وفنهار غادر لحمام لرصام
- 39وبقا غير طيفــو....◆حس لوليف الدنيا خوات عليه
- 40ضاقت عليه بلا حس وليفو◆وفلحظة وحين خلط عليه
- 41ملي لمحبة ولات سوق كلها داير فيها نيفو◆الله يرحم زمان راح بلي فيه
- 42
وكلها و رشوق راسو وكــــــلها وكيفــو