خالف ثلاثة
عبد العلي فيلالي بالحاج21 بيت
- 1خَالَفْ ثْلاَثَة يْنَجِّيكْ الرّْحِيمْ مَنْ النِّيرَانْ◆النَّفْسْ الْأَمَّارَة وْلَهْوَى وَالشِّيطَانْ
- 2وَرْضَا بَلْقَسْمَة تْكُونْ سْعِيدْ هَانِي◆لاَ تْسَالْ عَنْ الرُّوحْ أْمَرْهَا عَنْدْ الدِّيَّانْ
- 3وْلاَ عَلَى لَغْيُوبْ يَاتْرَاكْ تَفْهَمْ لِّي بَانْ◆رَبّْنَا يَظْهَرْ جْلاَلُو عْيَانْ لَلْقَاصِي وَالدَّانِي
- 4لَسْلاَمْ خَمْسْ فْرَايَضْ وَالثَّانِي لِيمَانْ◆وَكْمَالْ الدِّينْ يَا لْغَافَلْ هُوَ لَحْسَانْ
- 5هَذَا يْكَمَّلْ ذَا هَكْذَا سِيدْ الرّْسُولْ وَرَّانِي◆لِيمَانْ شْرُوطُو بَعْدْ كْمَالْ لِيتْقَانْ
- 6لْخَمْسْ فْرَايَضْ وَالشّْهَادَة أَمَانْ◆وَالصّْلاَ وَزْكَا وَصومْ وَلْحَجّْ ايْلاَتَصْغَانِي
- 7يَا مَنْ هُوَ بَسْرَابْ الدُّنْيَا مَسْرُوقْ◆شْكُونْ هَذَا لِّي كَانْ فَالدُّنْيَا وْبَاقِي
- 8مَا فِيهَا غِيرْ يَا سَابَقْ يَا مَسْبُوقْ◆وْمَا يْفُوزْ غِيرْ مَنْهُو فَحْيَاتُو تَاقِي
- 9الدَّنْيَا سْوَاقْ سُوقْ يَطَلْقَكْ فْسُوقْ◆وْيَا وِيحُو مَنْ يَخْرُجْ مَنّْهَا شَاقِي
- 10شْرُوطْ لَوْلاَيَة تَقْوَى وَايْمَانْ فَلْقُرْءَانْ◆بَشَّرْمَنْ وَالَى رَبّْنَا سُبْحَانُو بَالأَمَانْ
- 11نَاسْ الَكْتَابْ وَالسُنَّة النَّهْجْ الرَّبَّانِي◆النَّفْسْ عَلَى مَا رَبِّيتِيهَا مْثِيلْ عْيَالْ
- 12وْكَمّْ مَنْ وَاحَدْ عْيَالُو كُلْهَا وْحَالُو◆فِيهَا لِّي غَايْتْهَا فَلْفَانْيَا جَمْعْ لْمَالْ
- 13وْفِيهَا لِّي مَالُو وْسِيلَة كِيفْ مَا قَالُو◆عَلِيهْ يَتْحَاسَبْ بْنَادَمْ حْرَامْ أَوْحْلاَلْ
- 14كْمَا يَتْحَاسَبْ عَلَى عَلْمُو وَفْعَالُو◆الرُّوحْ تَبْقَى شَابَّة فْلَجْسَمْ لْفَنْيَانْ
- 15وَالنَّفْسْ لِّي تْذُوقْ الْمُوتْ فَالأَوَانْ◆رَوْضَة وَلاَّ حَفْرَة مَنْ نَارْ وْمُولاَهَالْبَانِي
- 16لَهْوَى لَلّْذِي تْبَعْ شْرُورْ نَفْسُو فَهْوَاهَا◆تْقُولْ عْمَلْ وَصْنَعْ وْعَمَّرْهَا لَلْخِيرْ مَا تَهْدِيهْ
- 17يْبَيَّنْ لَلنَّفْسْ لَخْسَارَة رْبَحْ وَلاَ شِي يَنْهَاهَا◆بْنَادَمْ تْنَعْمَى لُو لَبْصِيرَة بْقَوَّةْ مَا يَغْرِيهْ
- 18وَالشِّيطَانْ يْزِيَّنْ لَفْعَالْ حَتَّى لْمَنْتْهَاهَا◆وَيَتْنَكَّسْ لَعْدُو وَيْوَرِّي صْفَايَحْ رَجْلِيهْ
- 19مَا يَنْفَعْ غِيرْ لَخْضُوعْ لْمَنْ يَطْلَبْ لْغُفْرَانْ◆مَا حَدّْ الرُّوحْ مَا طَلْعَتْ مَنْ صْمِيمْ لَبْدَانْ
- 20كْمَا نَسْتَغْفَرْ وَنْقُولْ يَا رَبِّي تَقَّل مِيزَانِي◆بْغِيتْ مْسَكْنِي أَعْلَى عِلِّييِنْ فلَجْنَانْ
- 21وْيَتْمَلَّى الْفِيلاَلِي فَوْجَهْ لَكْرِيمْ بَعْيَانْ◆وَغْفَرْ مَا خْطِيتْ يَارَبِّي وَغْفَرْ زَلاَّتْ لْسَانِي