أحمد محمد سلامة
عبد الرحمن بن مساعد65 بيت
- العصر:
- العصر الحديث
- 1في زمن وهمي من الأزمان◆كان ياما وياما كان ..
- 2سلطنة وسلطان ..◆وف يوم من الأيام ..
- 3يتصفح السلطان جريدة ..◆موضوع يسترعي اهتمامه ..
- 4أحمد محمد سلامة ..◆فـرد من أفراد شـعبه ..
- 5يائس وأوضاعه صعبه ..◆في الصبح يشتغل بواب ..
- 6في مدرسة أطفال ..◆وفي الليل يشتغل شيّال ..
- 7عنده ثلاث عيال◆فيهم مرض نادرعضال ..
- 8ماله علاج إلا فبلدان بعيدة ..◆كلفته ما يحتملها وفاقته أصلاً شديدة ..
- 9انسدت الدنيا أمامه ..◆وارتأى أن الطريقة الوحيدة ..
- 10لفتح أبواب الأمل ..◆انه يوجه ندا .. عبر الجريدة ..
- 11لاهل الكرم .. واهل الشهامة◆تبرق .. في عين سلطان البلاد غمامة ..
- 12ويهطل الدمع من عينه ..◆يمسح الدمع بكفوفه ..
- 13ويخلع العمامة ..◆ويرفع للسما راسه ..
- 14ياربي الفرد الصمد ..◆سترك وعفوك ..
- 15ألهتنا عن الناس ..◆أمور الحكم والسياسة ..
- 16ينادي سلطان البلد :◆يا حاجب ..
- 17استدعي معالي وزير السلطنة الأول .. رعد ..◆يجي رعد .. ويبدي ولاَءه واحترامه ..
- 18ـ صاحب المجد والكرامة ..◆سيدي السلطان أمرك ..
- 19ـ أي كرامة يا رعد .. أي كرامة◆والمواطن في البلد .. ضايع مقامه ..
- 20اتركك عن هالحكي .. واسمعني زين◆هذي مليونين خذها ..
- 21وصلها لمحمد سلامة◆أحمد محمد سلامة
- 22خذ الجريدة .. تلقى التفاصيل في الجريدة◆لكن اسمع يا رعد .. ما أبي يدري أحد
- 23أحذرك .. لا صحافه .. ولا جرايد◆هذي لوجه الله أبيها ..
- 24ويعلم الله .. من وراها ..◆ما أبي مدح وقصايد ..
- 25أرتجي عفو الكريم ..◆في يوم بالأهوال زايد ..
- 26ـ سيدي السلطان خيرك .. في القديم وفي الجدايد◆ربي يجزيك المثوبة .. ويعينك بوقت الشدايد
- 27ـ يخرج رعد .. ويستدعي وزير المال والأحوال ..◆يجي مرسال .. أمرك معالي وزير السلطنه الأول ..
- 28تعال يا مرسال .. فوراً وفي الحال◆خذ المليون هذا ..
- 29وسلموه .. للمواطن أحمد محمد سلامه .. من سيدي السلطان◆مرسال .. لابد هذا يتم الآن .. فوراً وفي الحال
- 30وبأقصى درجات السرية والكتمان ..◆هذي أوامر سيّدي السلطان ..
- 31يخرج مرسال .. ويستدعي كبير الحراّس◆فراس .. يجي فراس
- 32أمرك يا وزير المال والأحوال ..◆ـ فراس .. تعال
- 33خذ هذي خمسمية ألف ..◆سلموها .. للمواطن أحمد محمد سلامه .. من سيدي السلطان
- 34خذ الجريدة ..◆تلقى التفاصيل في الجريدة
- 35خذها الآن ..◆فوراً وفي الحال سلمها .. وبأقصى درجات السرية والكتمان
- 36هذي أوامر سيدنا السلطان ..◆يخرج فراس .. ويستدعي النقيب ..
- 37يجي حبيب .. أمرك ياكبير الحراس◆ـ حبيب تعال ..
- 38خذ هذي المية ألف ..◆سلموها للمواطن .. أحمد محمد سلامه .. من سيدي السلطان
- 39تلقى التفاصيل في الجريدة ..◆خذها الآن سلمها .. فوراً وفي الحال ..
- 40هذي أوامر سيدنا السلطان ..◆يخرج حبيب ..
- 41ويستدعي مسئول المساكن◆ـ مازن .. تعال .. خذ الخمسين ألف هذي
- 42سلموها للمواطن .. أحمد محمد سلامة .. من سيدي السلطان◆خذها الآن سلمها ..
- 43وفوراً وفي الحال ..◆هذي أوامر سيدنا السلطان ..
- 44يخرج مازن .. ويستدعي رئيس الحي ..◆اللي ساكن فيه أحمد ..
- 45عبد الحي ..◆يجي عبد الحي ..
- 46ـ عبد الحي تعال◆خذ هالعشرين ألف
- 47سلموها .. للمواطن أحمد سلامه◆خذها الآن .. وسلمها لأحمد سلامة
- 48أهم شي السرية والكتمان ..◆هذي أوامر السلطان ..
- 49يخرج عبد الحي ..◆ويتوجه لمكتبه في الحي ..
- 50ويستدعي مساعِدُه أمين ..◆ـ تعال ياأمين .. تعال .. شوف الجريدة
- 51وخذ الألف هذي ..◆سلمها لأحمد سلامه
- 52ساكن هناك .. عمارة في آخر الشارع◆جنب مدرسة الكرامة ..
- 53الدور الرابع .. شقة ستة◆وديها الآن .. وقل له ..
- 54هذي من سيدنا السلطان ..◆واسمع ياأمين ..
- 55احرص على السرية والكتمان ..◆هذي أوامر السلطان
- 56أمين واقف ورا باب شقة◆يدق الباب ..
- 57صوت من خلف الباب ..◆ـ أنا أمين .. مساعد رئيس الحي ..
- 58يفتح الباب .. أهلين وسهلين ..◆ـ هذا بيت أحمد سلامه
- 59ـ نعم أنا أحمد سلامه◆ـ أحمد محمد سلامة ؟ ..
- 60ـ أحمد محمد سلامه ..◆ـ ممكن إثبات
- 61ـ فعلاً أحمد محمد سلامة◆سيدنا السلطان .. موضوعك استرعى اهتمامه
- 62سيدنا بيسلم عليك◆وحب يطمن عليك
- 63وكلفنا ننقل لك رسالة :◆سيدنا السلطان .. أدام الله أيامه
- 64يتمنى للأطفال عندك ..◆كل الشفا وكل السلامة
- 65مبروك يا أحمد تستاهل ..◆مع السلامة .. !