مانيش ندمان
عاطف الجندى41 بيت
- 1مانيش ندمان◆و فاكر يا أمه من صغري
- 2ولد عاوز يهد الكون◆ولو ممكن يعيدهولك
- 3يشيل الحزن من عينك◆ويرسم ضحكتك خضرا
- 4يحقق كل آمالك◆تشوفى حلمك الماشى
- 5يحط الخطوة بسَّامه◆ف سنه أولى
- 6يروح الصبح مدرسته◆ودمعه سارى فوق خده
- 7وحاطه ف شنطة أحلامه◆وكتابه وقلم مبرى
- 8وكراسه ودعا.. و حجاب◆وآية الكرسي
- 9تقريها على رأسه◆و تدعي له يكون دكتور
- 10وعز الدمعه ما هي نازله◆تقولى مصر محتاجه لأىِّ نهار
- 11وبعد محايله ومناهده◆يقوم رايح على حلمه
- 12ويكتب حرف و التانى◆تيجى تصقيفه يسمعها
- 13و برافو عليك◆و ياخد النجمه و العشره فى كراسته
- 14وآخر يومه يرجع لك◆وشوقه كبير
- 15تمدى القلب لاحضانه◆يورى لك ف كراستهُ
- 16توري له ف أحضانكْ◆طريق الحب مرسوم له
- 17وخطوه بعدها خطوه◆بقى دكتور ف أحلامه
- 18بقى طيار بأشعاره◆عشان قلبك حكى له كتير
- 19عن الحريه للأوطانْ◆وعن مينا و عن رمسيس
- 20إذا جالنا فى توب دوله◆فى يوم عشره لشهر الصوم
- 21وقلت ِ له عن الكلمه◆وتأثيرها إذا إنقالت طبيعيه
- 22تكون دانه على الضلمه◆تكون طاقه لحريه
- 23تكون بستانْ◆ولو كانت خيال ماشى
- 24على الجدرانْ◆أنا هوَّ ، الولد اللى
- 25فضل عايش ف أحلامه◆ولىَّ شنطه بملاها
- 26وأنا مروَّح ْ◆بدل ماآخد لأولادي
- 27كيسين فاكهةْ◆آخد ليهم كيسين تصقيفْ
- 28و ييجى الواحد الجاهل◆يقول لى بكام؟
- 29و إدوك كام؟◆إذا نزلت لي ف الجرنان
- 30قصيدة عن هوى الأوطان000◆يقول لى ما تكتب الهايف
- 31على ( مُترب ) يكون هايف◆يغنى لك ، و تتريشْ
- 32وأقول له أصل أنا أمي◆قالت لى _ من زمان_ يا ابنى
- 33سوى نبضك على ورقكْ◆وأنا طول عمرى ابن أمِّى
- 34و أتريق على مفهومه للدنيا◆على تقديري للأشياء
- 35أنا يا أمَّه◆بقيت تايه فقولى لى
- 36بحق الطيبه ف عنيكِ◆مين الغلطان ؟!
- 37و مين خَرْفان؟!◆و مين عايش
- 38فى سجن المال بلا سجَّان؟!◆ولكن يا أمَّه واللهِ
- 39برغم التوهه فى العنوان◆مانيش ندمان على حاجه
- 40و يكفينى أكون ابنك◆و يكفينى أكون شاعرْ
- 41
أكون إنسان !