ماجد
صالح السنيدي15 بيت
- 1أحمدك ربي وأنا كلي خشوع◆يا إله العرش يا رب الأنام
- 2قبل رد الشعر بدّيتْ الركوع◆ساجدٍ ما بين ريضان واسهام
- 3وجهتي للسهم حلال الجموع◆شيخ مرضين الوغى يوم الزحام
- 4يا هلا ما اليوم لا يوم الشفوع◆بك هلا (ماجد) تهالِيّل الشهام
- 5فزعتك حنا ولك صلّب الدروع◆يوم مشعال الوزى قص الصرام
- 6يا هلا بالشهم جاك الشعر طوع◆زخرفاته بين حلوات الشمام
- 7لابسٍ ثوب المفاخر والطموع◆طمعته بس تنرضى بنت الحشام
- 8يا بنات الفكر من يوم الربوع◆بانشدّ.. الزّمل راخين الخطام
- 9لين نلفي داركم ملفى سبوع◆نرضي الهامات ونزيح الخصام
- 10فالهوى يا خوك كم قلبٍ خلوع◆كبوة الفارس تبع ريش الحمام
- 11القلوب أخوان والفرقا دموع◆والمحبه نبت.. يسقيها الوئام
- 12قمت يا منواي مقصودك سنوع◆سنة الله تجمعك والخير حام
- 13أشعل الأشواق وقلوب الشموع◆ورد وعطورٍ يزاغيها وسام
- 14ساريات السحب تمطر للرجوع◆تجمع أقلوبٍ على عشق ومرام
- 15يا عساها بالمحبه لك سموع◆وينتشي قلبك مع الذكرى سلام