ماجور باذن الله يا طيب الفال
سلطان الجالي17 بيت
- 1ماجور بإذن الله ياالطيب الفال◆عسرك يزول ومن ورى العسر تيسير
- 2لابد ماتفرج على كل الاحوال◆والحمد للي قدر الامر تقدير
- 3والله وهبك الصبر في بحر الاهوال◆وانت الذرى لاهب فالوقت معصير
- 4قلبك سليم وممتلي طيب وامال◆وعقلك رجيح وتمتلك حسن تدبير
- 5كم شلت فوق المتن بعزومك اجبال◆وياكم تسوق الرجل للبر والخير
- 6ياكاسب المعروف في كل منزال◆وعون الرفيق الي ورد جمة البير
- 7هداج تيماء حالي الطعم وازلال◆والناس في مجلسك ورد ومصادير
- 8ماخاب لويوم الرجى فيك مامال◆مثل الذهب معدنك ماهو بقصدير
- 9لايشغلك تفكير ياالشامخ العال◆وذخرك يزود المرجله دون تقصير
- 10الي مثل شرواك خلف له اعيال◆محزم ظهر لاكشر الوقت تكشير
- 11لاضاقت الدنيا سند جنبك ابطال◆ماردهم عن هامة البر تبرير
- 12ياسعد من مثلك على دربه ارجال◆ومدهل وفا مايسكنه دونك الغير
- 13بقلوبهم لك يزرع الود مدهال◆مافاض منه يعطر الارض تعطير
- 14لاشفتهم ترتاح وتريح البال◆وترقا جناح البر حشمه وتقدير
- 15واقول لك لاباس ياطيب الفال◆جعلك تعيش ابخير وتدوم في خير
- 16وصلاة ربي عد ماهل همال◆واعداد مايكفخ جناحينه الطير
- 17على نبي الخير والصحب والآل◆والي على منهاجهم يبشر بخير