لاهبت الريح بقلوب الهواويه
سلطان الجالي19 بيت
- 1لا هبت الريح بقلوب الهواويه◆ترمي ولا خاب بالتصويب مرماها
- 2ترمي والأشواق هبتها شماليه◆ترجف بالأضلاع لين تحطم أقصاها
- 3يرسل بها الشوق من مشتاق برقيه◆تسقيه الآمال في لقياه وأسقاها
- 4ويجَلس الزين هوجاسه على زيه◆في مجلسه لين شوف العين يزهاها
- 5وأجمل معانيه في لقياه معنيه◆هج الهواجيس عند الزين عناها
- 6بين الهواجيس والمحبوب رديه◆من بدع الأفكار قام يصوغ مبناها
- 7يبدى مشاكيه للمحبوب مرثيه◆يرثي بها الحال والترحال مشكاها
- 8يكشف عن جروح للملوح مدميه◆ياراحة الروح للمجروح ودواها
- 9ويبين أسرار باالمحتار مخفيه◆عن مجمل الناس للمحبوب خفاها
- 10لا ظلم الليل يلقى وجهها ضيه◆وتشوف الأفراح في لقياه مضواها
- 11يرحل مع الطيف لو في رحلته كيه◆حتى مع الطيف دون الحيف يدراها
- 12سر الهوى فيه مايشرف على طيه◆غي الشياطين فيه تشوف مضماها
- 13لو يخلف الصدق لقلوب البشر نيه◆تغري شياطين بعض الناس وأغراها
- 14عن هرج الأدناس بالحرَاس محميه◆عن عين جساس للمكنون خفاها
- 15روحات الأيام ماتطري لها الجيه◆وأحلام الأيام تفني من ترجاها
- 16لو هي تناساه مادور على غيه◆ماتنقل الناس بالهوجاس طرياها
- 17يمكن تناساه لين تصير منسيه◆وتصير الأيام ذيك أحلام ينساها
- 18وطيور الأرواح ماموره ومنهيه◆لوهي تناساه تبقى الروح مذراها
- 19شفت الهوى كيف يلعب بالهواويه◆وشلون الأحلام ماترسي بمرساها