بكت عيني اليمنى بدمع وزجرتها
سلطان الجالي20 بيت
- 1بكت عيني اليمنى بدمع وزجرتها◆وبالعذل والتقريع لمت ونهرتهـا
- 2وقلت احشمي ياعين بالناس قدري◆مادامت الشكوى بصدري سترتها
- 3فلا..تفضحين الحال ياعين مالـكِ◆ولاتنبشين أحزان دامـي قبرتهـا
- 4من عذلي انهارت وهلت وهيجـت◆بدموعها اليسرى وليتي عذرتهـا
- 5وقامت تهل ومسبل الدمع يندفـق◆وتجري بعصياني بعـد ماامرتهـا
- 6تقول وشبك ليش تدري ولمتنـي◆برسوم لاجاشت اضلوعك ذكرتها
- 7ارسوم ماتنسى بالأيـام رسمهـا◆لو الفيافي طول عمـرك عبرتهـا
- 8واتمر مادامك بهـا حـي تـرزق◆ريضانها اللي بالمحبـه عمرتهـا
- 9ياكم وكـم مريـت مـره ومـره◆اطلال لالاحـت بدربـك نحرتهـا
- 10يومك تجيهـا بالمشاهـد تذكـرك◆بوصوف دارك لافنيت وهجرتهـا
- 11وتطوف ماوافق بالأرواح طايـف◆ارواح ماتدري لوانـك حظرتهـا
- 12كم تحبس الجدران وحدود منـزل◆اجساد بكتاب الملامـح بصرتهـا
- 13ارواحها مع ساكن الـود تسكـن◆ومع غيبته غابت لو انك نظرتهـا
- 14حتى انت لك لوح بكفـه مـوادع◆سافر وله قطرات دمعـي نثرتهـا
- 15لاللعتـب لعيـون ذابـت وذبلـت◆دامي محاجرهـا لذكـره نذرتهـا
- 16لي العزى قطرات مايـوم تنقطـع◆مـادام ذكراهـا بليلـي سهرتهـا
- 17لوقلت ياعينـي بدمعـك كذبتـي◆وتكابر ونفسك بنفسـك قهرتهـا
- 18وتروح بي يم الأطبـاء وتدعـي◆بأوجاع موهومه بضنك نشرتهـا
- 19ابديت لك وابديت بالصدق حجتي◆برسوم مرسومه بخـدك حفرتهـا
- 20وابين اللـي بالمحاجـر تبـروز◆لك صورته لاتحسب انك كسرتها