الله وكيلي
سلطان الجالي31 بيت
- 1الله وكيلي هو خلقني من امشاج◆وخلق لي اعيوني وسمعي معاديل
- 2لجل التمس في ضيقة الدرب مخراج◆واعرف طريق الخير والشر مااعيل
- 3ياليل ياساري لك احروفي اسراج◆مني قبس نوره ضوا عتمة الليل
- 4لاتشتكي لوطال دربك من احراج◆اوتشتكي من كثرة الحط والشيل
- 5جعل الرجى يلقا مع النور مخراج◆ويزودني سامع جزيل الثماثيل
- 6يهدي حبيس بغربته حكم الافراج◆ويمشي ويقطف له من الورد اكاليل
- 7ماقيل انا شاعر من النور نساج◆وماهو لجل قد قلت ماقلته وقيل
- 8باديه انا ماجيت سارح ودواج◆ومبغى بعد لي منه رد المراسيل
- 9حاصد كفافي مابعد جيت محتاج◆عندي غناتي ماعدمت المحاصيل
- 10وتلاطمت يامركب الفكر الامواج◆وابحرت وآني في محاميك ماميل
- 11كني وانا اراقب مرافيك بادلاج◆عاقل وانا سايح لبس بردة اخبيل
- 12كاتب بلا مكتب ولاعنده ادراج◆ديدن حديثه يشتكي من غرابيل
- 13آبد وهو مطرق ولايرفع احجاج◆غض النضر ماعاش جيل بعد جيل
- 14لو ينحصر قلبه وهو جوفه اخلاج◆يمشى على رجوا الفرج فالمقابيل
- 15كسير ماله بالحزن جبروعلاج◆وحط الجفا دون اللقا و المواصيل
- 16قلبه وهو طارق بلا صوت لجاج◆جابه يسوقه سوق من دون تمهيل
- 17ولي معه يا كبدي على حامي الصاج◆ياحمس ميعاد الكبود المغاليل
- 18كني وانا واقف على اطلال هداج◆استنطق الي كان ينطق لي اقبيل
- 19جاني موارد جم واعدوده اهواج◆لين التغاضي بالغبا صار تمثيل
- 20ماني على داير سوانيه رعاج◆تنظر لي الي تجذب احبالها سيل
- 21وهدوئها الي لجني صمته ازعاج◆قامت تدن ارعود فيه المخاييل
- 22وانشد وينشد للخبر صاحب اسياج◆لين يتبصر ناشدي بااللمعاويل
- 23ماشفت فكري غير يوم البحر هاج◆وعم الثريا والجدي صاحب اسهيل
- 24من هو ليا الدهناء نقل عين الافلاج◆و من حول الديسه ليا ام التماثيل
- 25وكيف الهرم مارب وسده بسوهاج◆صارت نعامتنا بليا خلاخيل
- 26ان غرر المحتال اهل ساحل العاج◆ماغرر ارجال الجزيره ولا النيل
- 27اللي تقص اسيوفهم حبل الاوداج◆تمسي سمان القوم منهم مهازيل
- 28ماسدد العملاق في دين محتاج◆ترجم لهم تاريخ ماهم مجاهيل
- 29والفخر ماهو كرسي ومنصب وتاج◆ومكاثر الانعام والحرث والخيل
- 30الفخر في مبداء وشرعه ومنهاج◆ايضا وفي غرة مواضي وتحجيل
- 31والعز يقطع له على ضامر افجاج◆اللي قبل ما ينزل بشوفه يحيل