عجايب
سارى10 بيت
- 1قلبت بالدنيا على كل طاروق◆ياكثر ما شافت عيوني عجايب
- 2هذا جريح ٍ سال دمه بلا طقوق◆ما يدري ليش وماعرف له سبايب
- 3وفيها الوفا كفن مع الوقت بعقوق◆وفرح به اللي حاقد ٍ ولا خايب
- 4ظلمه تجاوز كل عابد ومخلوق◆يظن رآيه فوق رآيك وصايب
- 5وهذا زمان ٍ صار للظالم حقوق◆يبني صروح المجد فوق الخرايب
- 6خرايب ٍ في اطلالها قلب وعروق◆وانفاس روح ٍ ماتعرف المعايب
- 7الثوب ما يستر إلى صار مشقوق◆والسيف ما يقطع بكف ٍ تهايب
- 8وش حيلتك لا صرت حر ٍ ومفهوق◆وش حيلتك لا روّحوا بالركايب
- 9اسمع نصيحة صاحب ٍ هرجه صدوق◆ماعاش منهو حاسب ٍ للنوايب
- 10بالموت يصبح سيد النفس معتوق◆والحي مملوك ٍ لصغر الرغايب