ثروة وثورة
زايد الرويس17 بيت
- 1تفجرت من مسـا البـارح براكينـي◆والحزن عشٍ تهادى فيـه عصفـوره
- 2الليـل طفـلٍ يغنـي فـي شرايينـي◆يضج صوته كأنـه وسـط مقصـوره
- 3والصبح كهلٍ تعثّـر ب اول سنينـي◆عصاه شمسٍ تطيح ليـا انتهـى دوره
- 4والشارع الممتلي باخطـاء عشرينـي◆اقرى رصيفه ولا تغرينـي سطـوره
- 5من علـم اللوحـه وفرشـة تلاوينـي◆تستنطق الصمت وتفزز بـه شعـوره
- 6ويضج كل المكان بصرختي: وينـي؟◆وتمر الايـام فـي ذكـراي مذعـوره
- 7يا تاركتنـي غريـبٍ فـي عناوينـي◆الصبح مدري علامـه ينكـره نـوره
- 8من يوم قلتي بسافـر شلتهـا عينـي◆وبروزت قلبي ووجهك صار له صوره
- 9في كل نبضه أحـس انـك تنادينـي◆وامـد يـدي لقلبـي واقلـع جـذوره
- 10كله علشـان اشوفـك منّـي وفينـي◆واخلي الشوق يصعـد مثـل نافـوره
- 11وارتـب المفـردات وتكتـب يدينـي◆الحب ثروه متى ما صار بـه ثـوره
- 12البعد حاجـز يوقـف بينـك وبينـي◆ابكسره واجعل الريضـان ممطـوره
- 13غيبي وانا باكتبـك داخـل دواوينـي◆واهديك عمري وكلٍ هـو وميسـوره
- 14تطفي سمـا نجـد لامنـك تركتينـي◆وتنوّر الديـره اللـي فيـك مغـروره
- 15واذا اتصلتي وقلتـي وينـك ووينـي◆باقول جالس هنا جنبك يـا سنيـوره
- 16ليتك عرفتي غيابـك ويـش يهدينـي◆يهديني الشوق في غيبتـك وحضـوره
- 17واسرق بعض ذكرياتٍ منـك تكفينـي◆وعشٍ من الحزن توه طار عصفـوره