ما كنت ادري
حمدان بن محمد بن راشد المكتوم14 بيت
- 1ماكنت أدري وش تخبي عيونك◆يالين شفت الحب كله وانا وياك
- 2وياك احس اني مكمل جنونك◆و اهيم في بحرك و انا طير في سماك
- 3مقدر اعيش العمر لحظه بدونك◆يا غايتي الأولى ترى همي رضاك
- 4في طلتك تملى السحاب بمزونك◆ولا رحت كلي راح في مركب هواك
- 5ودي أشيل الحمل من ع متونك◆و اقاسمك أفراحي وكل الأضحاك
- 6انت البدايه والنهايه ف سجونك◆أسعد سجين يعيش من دون ادراك
- 7لا قلت أبغى قلت لك تَمّ عونك◆كل الكواكب والمجره والأفلاك
- 8تحت الأمر لا قلت تبغى يجونك◆الكون كله تحت أمرك وهو جاك
- 9اضيع من عينك ورسمك ولونك◆و اضيع من دونك اذا طال لقياك
- 10في مشيتك كل العرب يتبعونك◆هيبة حضورك خلت الكل يبغاك!
- 11مقدر أخونك لو عيوني تخونك◆خانتك مع ظل يشابه محياك
- 12لا تزيد في قولك ولا في ظنونك◆قلبي يصونك لان عقلي تمناك
- 13أغار لا شفت البشر بيطرونك◆اسمك بدا بالميم والقلب سماك
- 14سماك بالمخفي لكي لا يرونك◆كل العيون اللي تشوفك بتهواك