ياوجودي يوم شفت الديره المهجوره
حسن عامر آل عيسى14 بيت
- 1اذكر الله قبلما يجري القلم بسطوره◆في بداية منطقي بسم الله الرحماني
- 2ياوجودي يوم شفت الديره المهجوره◆ديرتي يا مقسم الاباء والجداني
- 3بعدما كانت بخير وبالسكن معموره◆اصبحت قفره مخيفه مابها سكاني
- 4والمزارع والمساكن كلها مدموره◆يوم اطالعها بعيني هيضت وجداني
- 5كنها تشكي ومما صابها مقهوره◆مثل منهو يشكي الحرمان والهجراني
- 6ذكرتني يوم كانت بالثمر مثموره◆لابسه ثوب الجمال الأخضر الفتاني
- 7ياحلاوة زينها وجبالها ممطوره◆والطيور اسمع غناها باعذب الألحاني
- 8كنها بنتن عروس بزينها مغروره◆من يراها تفتنه يغدي لها عشقاني
- 9الشعر يعجز يوفي وصفها وبحوره◆طول القيفان ولا قصر القيفاني
- 10عاش فيها اباؤنا واحوالهم مستوره◆بالرجوله والكرم والعزّ والايماني
- 11والمراعي والمساقي بينهم مشطوره◆والتكاتف والتعاون حسبة الأخواني
- 12صيتهم وافعالهم بين العرب مشهوره◆ماحدٍ منهم وقف لفلان ضد فلاني
- 13يالله ان تجعل جميع ذنوبهم مغفوره◆ياجليل الملك يالواحد عظيم الشاني
- 14واجب الشاعر بمكنونه يصيغ شعوره◆وانا قلت ابيات بأفكاري وصح لساني