يالعاقل اصبر للزلل
حسن عامر آل عيسى12 بيت
- 1يالعاقل اصبر للزلل مادام جاريت السفيه◆حيث السفيه ان جيت تبغي ترفعه يرجع ورى
- 2واذا تسيفه طنشه ولو يشوش الراس فيه◆ردك يعليّ هامته ويبينه بين الورى
- 3والجاهل اذا من تشره ماحدن يشره عليه◆ماقد خبرنا عاقل في شرهة الجاهل زرى
- 4تراه لو يرمي حجاره رميه يكسريديه◆والله سبحانه فرق بين الثريا والثرى
- 5والذيب ماهاب الكلاب وكل ريع يعتليه◆الذيب يعرف كيف يصطاد الحصاني والجرى
- 6والصيرفي يعرف مدى فرق الريال من الجنيه◆من دون ما يرجع يقلب في سجل ودفترا
- 7ومجادلك بالحكمه العراف بيضان الوجيه◆تكسب معارف من معارفهم وهم فخر وذرى
- 8خاو الذي بالدين والحكمه وله راي نزيه◆اخوة الطيب تزيدك ريح مسك وعنبرا
- 9والمجلس اللى يسمعك نمّه وغيبه لاتجيه◆لوكان فيه البن الاشقر في دلاله ينثرا
- 10لاكبر الله مجلس الغيبه ولا من ينتحيه◆ولابارك الله ناقلين الهرج كذب وافترا
- 11هذي نصيحه عابره يفطن لها العقل النبيه◆وكان النصايح بالذهب عند العوارف تشترى
- 12وصلوا على خيرالبشر صلى الله وسلم عليه◆اللى بعثه الله وحل بطيبه وام القرى