ألف أبدي الله في أول كلامي
حسن عامر آل عيسى58 بيت
- 1الف - أبديّ الله في أول كلامي◆ثم الصلاة على النبي والسلامي
- 2في مبتدا قولي وعند الختامي◆ذكر الله الفرد الولي عالي الشان
- 3البا- بذكر الله فرج كل مكروب◆بامره يطير الطير بافراد وسروب
- 4بجوّ السماء يسّر له اكله ومشروب◆وارسى الجبال بدون ميده وعمدان
- 5التا-اتفكّر وزعجتني التفاكير◆في ماقفٍ يظهر به الشر والخير
- 6يوم الحساب ويوم كشف التقارير◆كلٍ يقول يالله بعفوٍ وغفران
- 7الثا- ثلاثٍ حطها وسط بالك◆الادمي لو طوّل العمر هالك
- 8والوقت يقلب لو تظنّه صفالك◆ومن كلام الناس مايسلم انسان
- 9الجيم- جاهد نفسك بطاعة الله◆دين النبي المصطفى خير ملّه
- 10من طاع شيطانه ونفسه تذلّه◆وتورّده مارد سفاله وحقران
- 11الحاء- حبّ لغيرك اللى تحبّه◆لنفسك وحاذر كل غافل تسبّه
- 12مجالس الغيبه تعقبّ مغبّه◆من حبها يلقى الندامه وخسران
- 13الخاء- خمس فروض ربي فرضها◆الله بحفظه يحفظ اللى حفظها
- 14واللى يفرّط فالعهود ونقضها◆يندم ولا يفتاد لو قيل ندمان
- 15الدال- دآو القلب بالذكر والصبر◆واحذر من التزوير والكذب والكبر
- 16والله ما ينفعك في ضمّت القبر◆إلا العمل بالصدق والبر واحسان
- 17الذال- ذلّ النفس لأمك ولأبوك◆واحفظ مقام أخوانك أختك وأخوك
- 18والا قرباء حتى ولوقيل يشنوك◆لاتطاوع النمّام لو كان من كان
- 19الراء- ردّ العرف لأهل المعاريف◆ورحب وهلّ اذا طرق بابك الضيف
- 20واكرم بقدر ولا تزيد التكاليف◆وترا المرائي بالضيافات غلطان
- 21الزاي - زد في كل تقوى وطاعه◆واحفظ صلاتك في صفوف الجماعه
- 22هي الرصيد ومكسبك والبضاعه◆لاصار بالميقاف خاسر وربحان
- 23السين- سدّ اللازم اللى فتحته◆لوكان صخر لا تردد بنحته
- 24واحذر غبا الجاهل اذا انته نصحته◆هويحسب أن النصح أهانه وعدوان
- 25الشين-شاور عاقلٍ في للوازم◆خبير بالاشوار والفتل حازم
- 26وان جات للوقفات بالفعل عازم◆شوره سديد وصاحب الراي فهمان
- 27الصاد- صاحب راعي الصدق والدين◆لاتصحب اللى دايم الدوم منحين
- 28مايكسب العليا صحيب الرديين◆ومن جاور الجربا على الحول جربان
- 29الضاد-ضد الخصم لا جاك عايل◆مادامها وصلت لشبّ الفتايل
- 30واذا تحايل ردّ له بالتحايل◆حتى يعود لسكة الحق قنعان
- 31الطاء- طريق الحق خلّه طريقك◆لوكان جمهور البشر ما يطيقك
- 32يكثّر اعداك ويقلل صديقك◆أرض الآله وترّك الكل زعلان
- 33الظاء-ظلم النفس حاذر عقابه◆لوطال عمرك توب واحسب حسابه
- 34واحرص على نهج النبي والصحابه◆نبينا اللى دلنا خير الاديان
- 35العين- عينك غظها في نظرها◆كم نظرةٍ صار العما من خطرها
- 36والله عن العورات بالغظّ امرها◆المؤمنين أمرهم بغظ الاعيان
- 37الغين- غنم العلم اكبر غنيمه◆يكسي الرجال بثوب حشمه وقيمه
- 38ولاّ الجهاله عاقبتها وخيمه◆والعلم والحكمه معك طول الازمان
- 39الفاء- فراقك بعض الاصحاب مكسب◆اللى سجيه فيه يحلف ويكذب
- 40حطاب ليلٍ بالسواليف يحطب◆والكاذب المحتال ابد ماله آمان
- 41القاف- قم لله في تالي الليل◆واقرا القران بحسن خشيه وترتيل
- 42واكثر لرب الكون تسبيح تهليل◆عظّم جليل الملك في قلب ولسان
- 43الكاف- كفّ القول والهرج والمرج◆بعض السوالف لو تخلا في الخرج
- 44افضل ولو تقفل عليها في الدرج◆كم كلمةٍ ثارت كما يثور بركان
- 45اللام- لا تسمع هروج الوشايه◆نقّالها عنده مأرب وغايه
- 46يفرّق صفوف البشر بالدعايه◆يصنع هروج الكذب زورٍ وبهتان
- 47الميم- مدّ الرجل قدر اللحافي◆حتى ولو تمشي برجليك حافي
- 48وفزعه مع المنّه تراها تعافي◆لا بارك الله مرجلة كل منان
- 49النون- نور الحق بيّن وواضح◆نور الحقيقه دايم الدوم فاضح
- 50مثل البحر ما ميحوه النواضح◆لو يشترك في نزفه الأنس والجان
- 51الهاء- هلاك الشخص يمكن بكلمه◆كم ميتٍ بالقبر لو بان علمه
- 52قال الكلام اسباب موته وجرمه◆هذي الحقيقه وافهم العلم يافلان
- 53الواو- وفّ الكيل والحق وفهّ◆احذر من المكيال حاذر تطفّه
- 54ورافق خويٍ له كرامه وعفّه◆ولا ترافق فالمهمات رديان
- 55الياء- يالله يا عظيم الجلالي◆ياعالمٍ بالخلق أول وتالي
- 56يارب تنجينا نهار السوالي◆يوم الوزن بالعدل في كل ميزان
- 57وتمت وصلى الله على خير هادي◆نبينا اللى دلنا للرشادي
- 58مبادي الاسلام خير المبادي◆عدّ الجراد وعدّ ما هلّ هتان