المقفص
امجد الدبيسي27 بيت
- 1لا ماتطور من خذاله مقفص◆هذا كلام اللي خذا موتر سبور
- 2ماهمني هرجه بنفسه تخبص◆ولايفهمه لنه مع الجر مجرور
- 3وسط المدينه دايم يدور ويقص◆درب الغواني ياولد خله يدور
- 4ما كنه الا ياملا خيبته لص◆والا يشابه بومةٍ تكره النور
- 5لا مافهم دنياه ومعنا التحوص◆خله على فاله بي الشوق مسعور
- 6يالله ياابو جابر مع الصبح نقحص◆الربع زايد في حنينه ورى السور
- 7كنّه من اشواقه بنفسه تربص◆مشتاق للردميه وذبة البور
- 8مكملين العزبه بنيّة القنص◆وطرد الظبا من عقب شوفه بمنظور
- 9يسوى كثير ويقلب الربع لك نص◆ويزيد نصه نص ثم كمّل الدور
- 10من عجته صيدك يبي يطيح مغتص◆وإليا طرحته وانت بالحيل مسرور
- 11قل للظبا جيبي عليك مْتخصص◆كنه هواوي وانت بعيونه الحور
- 12واسمع خواته وش يردنّ بالنص◆الجيب هذا ذيب منهي ومأمور
- 13كنّه من احدانا لفانا بيقتص◆يعني على كل المهمّات مذكور
- 14له صيت ذايع بالمنصات منتص◆وينقال له من بعد مشوار مشكور
- 15ويبقى بمكانه مايبي له تحرص◆عليه ما ينخاف ساطي ومغرور
- 16إليا ركبته يعني انت مْتجعص◆كنك ملك واقف له الشعب طابور
- 17ولا اعطيته النمره وقام يترقص◆هز مصريّه على كاس منكور
- 18ولا اقفى معاه تردد شفاتك بأص◆كنّك بردّة نمرته حيل مطيور
- 19ووسط المدينه فارضٍ نفسه وبص◆يوم يتعدا تصبح الخلق جمهور
- 20وزبونه إليا جاه ماهو مْتفحص◆لنّه بافعاله خطيرٍ ومشهور
- 21ياما علشانه هك الزرق ترتص◆مصنوع للمطنوخ ولا يعرف قصور
- 22وسعره عليم الله ما ظنّ يرخص◆وكالته ماعندها دم وشعور
- 23لكن زمنّا باذن الايام يقرص◆خلا الحضاره للبشر طب دكتور
- 24ثم وكلونا فول..جبنه وحمص◆من عقب ماتلقى على الصيد منصور
- 25ومّن الشوارع لو بدا حيل ينقص◆اعرف ترى في داخل الوكر عصفور
- 26والا حبيب القلب ماهو مْتقلص◆لكن من احداث الزمن صار مقهور
- 27هذا الصحيح وعقبه اركب مقفص◆اخير لك من واردٍ صنعه سبور