يالواثق
العالية8 بيت
- 1يالواثق اللي قِِبـلتـه تخطف ألبـاب◆تملا العيون وْ تروي كْبـود و نْـفوس
- 2تمشي والأرض تْعِدّ وْتحسبلك حساب◆وْكلما إرتِفَع مرقاها يحلالِك الدوس
- 3سيرتْك ترفع روس وإتـدَسِّم أشنـاب◆وْكلمَتْك مثل السهْم لا فارق القوس
- 4ويمناك لا نعدمها كم عشّـت ذْيـاب◆وكم حَجّمت نفْسٍ.. نِفَش فيها طاووس
- 5ما لوم فيك الريم وْ تـلعات الأرقـاب◆وشوق العذارى اللي حواليهن حْروس
- 6وإنته جبل متـشيّـد إركون واطنـاب◆فارِع مقام وْ اصله ثابت ومغروس
- 7توقف شموخ.. وْتمشي تتبعك الألقاب◆تـجلس مهابة وتلتفت صوبك الروس
- 8قَـدْرِك سِما.. وإن كان ممشاك لِتراب◆والحـر قبْـل العين.. تـنـظـر له إنفوس