مسيتني
اسير الشوق10 بيت
- 1مسيتني الله يسعد لي مساك ..◆وينك زمان نسال عليك وتختفي ..
- 2وش عوقك عن شوفتي لك وش خذاك ..◆وانت الذي لا غبت يزداد تعبي ..
- 3هلا وغلا ومليون والفين في لقاك ..◆والله ما غيرك في هالعالم ابي ..
- 4يا متلفٍ روحي وانا روحي معاك ..◆مسموح دامك جيت آمر وش تبي ..
- 5حلو النبا يا زين ملفاك ونباك ..◆يا حبي لحسنك ولو هو معذبي ..
- 6الغيد في طلتك تاهوا وفي بهاك ..◆لا ريم اشوف ولا مهاة ولا ظبي ..
- 7ضي القمر والشمس بعضٍ من ضياك ..◆رح يالقمر عنا ويا شمس اغربي ..
- 8حزنا الحلا كله ويكفينا حلاك ..◆يللي سلبت عقول خلق الله سبي ..
- 9احيان اقول القلب ليته ما هواك ..◆يا ناره اللي كل يوم تقيد بي ..
- 10واحيان اقول الكون ما يسوى بلاك ..◆لولاك به ما ينبغى يا حبيبي ..