البارحه ليلي عسى
ابن جعيثن20 بيت
- 1البارحة ليلي عسى الله يعوده◆يازين وصل الليل ما بين الأحباب
- 2جيت الحبيب اللي وفت لي وعوده◆ماصار لى منبوز الارداف كذاب
- 3والى مكانه خالي من حسوده◆بدا التحية لي على هجة الباب
- 4خليت به يوم الزواهر شهوده◆في ساعة عنا هل الشر غياب
- 5عنده الين الصبح بانت عموده◆نادى المصلي بالجماعة والاجناب
- 6خلي على راعي الهوى ويش كوده◆عليه من هرج العرب ستر وحجاب
- 7شوفه دواي وعلتي من صدوده◆ودواه شوفي والمودة لها اسباب
- 8الله يديمه لي ويبقي سعوده◆والبيض عقبه لوصفن قلت مااناب
- 9قالوا عشيرك يا ولد ويش زوده◆وش نفله بالزين عن تلع الارقاب
- 10من قولهم تو النظر به نعوده◆لقيت مابه شي من الشين ينعاب
- 11تسمعوا وصفه وهذا وجوده◆ياطا بحدب منهن الروح تنذاب
- 12والساق دملوج سقنه مدوده◆في منبته ما هزعه كل هباب
- 13وانف قسم صافي خدوده وسوده◆وخرس بلا كحل مضاليل واهداب
- 14جيده ونهده محفياته جعوده◆وغر مناظيم عذيات وعذاب
- 15لا طول لا قصر بمشيه ركوده◆لادق لا عبج مثانيه ورغاب
- 16وتالي وصوفه ماحصينا عدوده◆للقلب نهاب وبالناس لعاب
- 17الشف يمه كل خيط يقوده◆ويلويه عن غيره لواليب دولاب
- 18هني من مثلي لمثله يفوده◆هذا الوكاد وكثرة الهرج ماجاب
- 19ما دام جسمي مالجا في لحوده◆ما انساه وهروجه عجاريف وعجاب
- 20وصلاة ربي عد ما رزم رعوده◆على النبي ما طقوا البدو منساب