هادم اللذات
نواف بن فيصل10 verses
- 1مايفضح اللي يحب إلا آخر اللحظات◆لامد كفه بالوداع وصد بعيونه
- 2معاه رايات الاسى وجيش من العبرات◆وبين الحنايا صهيل خيول محزونه
- 3كنه على موعد معك ياهادم اللذات◆من شاف ماصابه يقول الله في عونه
- 4سلام ياللي ناوي الفرقا عدد مافات◆وتعداد مامر السحاب وهلت مزونه
- 5سلام من قلب سكنته إنت والحسرات◆غلاي تكفي يامودع ناظري صونه
- 6إرحل وأنا برحل معي هم وتعب وسكات◆واسرار مابيني وبين الروح مدفونه
- 7إرحل مدام الله كتب لك يالحبيب شتات◆مالي على حكم القدر راي ولامونه
- 8مالي بعدك ألا الصبر ومجاذب الونات◆وقصيدي اللي كل خلق الله يغنونه
- 9وان طالت الغيبة ابنعي الحب لو مامات◆عسى الهوى بك يشتعل وتردك ظنونه
- 10وباحاول أنسي ولو يصيح الشوق بي هيهات◆وباحاول أسلا ولو يصيح القلب ما أخونه