اسمحي لي يا الغرام
نواف بن فيصل12 verses
- 1اسمحي لي يالغرام العذب يالوجه السمــــوح◆ان لزمت الصمت أو حتى لبست الاقنـــــــــعه
- 2اعترف لك ما بقى من عالي الهمه سفــــــوح◆انحدر كلي مثل طفل تحدر مدمـــعــــه
- 3من يبي بالله يفتح لي غلق صدره و ابــــــوح◆ضاقت الدنيا بشاعر طيب قلبه ضيـــــــــــــعه
- 4ما قبلنا الحظ قولي وين ابارحل ويــــن اروح◆الصبر ياهو يعذب و الاماني موجــــــــــــــعه
- 5اه يا جود الحزن وياي و الفرحه شحـــــــوح◆ضايع بهمومي الغبرا بوسط المعمـــــــــــــعه
- 6اشتكي لوسادتي دنياي واسمعها تنـــــــــوح◆كنها بعضي وبعضي وين هو من هو مـــــعه
- 7ايه انا و العالم المغرور و الياس اللحــــــوح◆خايض حرب الرياح اللي تسوق الاشــــــرعه
- 8مختلط في عبرتي حبر الشقى ودم الجـــروح◆ومستوي في نظرتي غرب الوجود و مطــلـعه
- 9عودي المبري بقى به من عطايا الوقت روح◆وفصل خامس حاير بين الفصول الاربــــــــعه
- 10وراس مالي ذكريات حلم وأمال و طمــــــوح◆لا صديق ولا رفيق ولا طريق واتبــــــــــــــعه
- 11نوب اسافر في سديد الراي ونب في جنــــوح◆مختفي صوت الحقيقه كيف ويش لون اسمعه
- 12سامحيني دام هجري واضح كل الوضــــــوح◆واسمحي لي بالرحيل بلا تذاكر وامتــــــــــــعه