أمل مقتول
مطلع الشمس10 verses
- 1أحس أني وسط ليليٍ طويلٍ ناسي فجره◆أعيش بظلمته واسرح بافكاري إلى المجهول
- 2أفكر وانتظر صبحي الجميل الباسم وعطره◆وتصدمني هواجيسي ولا ألقي لهمِّي حلول
- 3أنا مليت واحساسي معك ارهف من الشعره◆وألوم القـــلب لكنّه يعــاند وانته المـــسؤول
- 4اريــد ابكـي علـى قلبي وتخنقني أنا العبره◆واحس بدمعتي الحرَّى على محجر عيوني تجول
- 5تبي تنزل واعاتبها تقول اش فيك مغتَّره◆واقــول الصبر يا دمــعه انا وانتي نخل وخيول
- 6أنا يا ليل وش ذنبي تصبَّرني على القمره◆وتجبرني على همومك اعايشها بعرض وطول
- 7أهوجس واحسب نجومك وقلبي يلتهب جمره◆واضيّع حسبتي وفكري على باب الوصل مشغول
- 8أنا يا صبحي اترقّب طلوعك والأمل بكره◆أريد اتكــحّل بنــورك وليلي ينجــلي ويـــزول
- 9حقيقه أو سراب انته انا ما ادري وش الفكره◆انا صــبري بدى ينــفذ واخاف انك أمل مقتول
- 10أريد تعيد لي وقتي القديم وشمسه وبدره◆أريد اعــرف أنا منهو.. أريــد اتفــسِّر المجهول