قتال القلوب
مخاوي الليل12 verses
- 1محدٍ على ايديك النواعم ضربها . . . ما انت بـ على كل الذي صار مغصوب◆محد تيقّن بك ولا احدٍ حسبها . . . تبي تسكتني الى قلت مكتوب
- 2ما نعترض لكنك انت سببها . . . ممنوعك اللي تزعمه صار مرغوب◆بصيرتك مدري وش اللي حجبها . . . ضاقت بك دروبٍ وضيعت انا دروب
- 3النار في جسمي توهج لهبها . . . خطرٍ علي عظام جسمي لها تذوب◆كاسات مرك قلبي اللي شربها . . . ما اعتدت اذوق المر من يدّ محبوب
- 4مدري وش اللي في حياتك قلبها . . . تبي الصراحة انت قتال القلوب◆فاتت واشوف انه تزايد كربها . . . عسى الفرج ياتي وينحل مكروب
- 5ما غيرك أحدٍ تل روحي وجلبها . . . ثم بعتها برخيص من غير متعوب◆في سوق حبك لين رسم نصبها . . . وتركتني حيٍ مع الناس مصلوب
- 6ودفنت روحك يوم غرك شببها . . . حسبك لوحدك وانت بي دوم مصحوب◆أسرجت خيلي ثم غيري ركبها . . . خيالها ماله على الخيل من صوب
- 7طارت بها ريح العواتي هبـبها . . . في ليلةٍ لا سلم فيها ولا حروب◆اخترت من سو الخلايق عربها . . . دامك تخيرته فانا منك مسحوب
- 8نفسٍ حرمها الله ونفس وهبها . . . هذا له طلابَه وهذاك مطلوب◆إلا جروحي زاد فيها عطبها . . . بغيت انا الفكة وعودت منشوب
- 9الياس فيني هز نفسي وغلبها . . . وانا اللي معلق بقلبه ومقضوب◆نفسي ولو عافت قدرها غصبها . . . ترضى بواقعها ولو كان مزروب
- 10غنيت ليلة كل حزني طربها . . . مرات اهيجنها ومرات مسحوب◆وجمعت في نبرات صوتي عتبها . . . وعن غلطتي استسمح اليوم واتوب
- 11ضوي طفت عقبك و رمّد حطبها . . . حرام عقبك لا ولا عود مشبوب◆حتى معاميلي على الجال كبها . . . جنبت خلق الله كما حال مجروب
- 12حالي بك أصلح حال وأجمل وهبها . . . حالي بدونك من عوافيه منهوب◆صدّك خطف ضحكات عيني وسلبها . . . ولا ترى وصلك يرد الفرح نوب